ბათუმში, ჯავახიშვილის ქუჩის რეაბილიტაცია დასრულდა. როგორც „ინტერპრესნიუსს“ აჭარის ავტონომიური რესპუბლიკის მთავრობიდან აცნობეს, აღნიშნულ მონაკვეთზე სანიაღვრე სისტემის მოწყობა, ბორდიურებისა და ტროტუარების მონტაჟი განხორციელდა, ასევე სრულდება ასფალტის საფარის დაგების სამუშაოები.
მათი ინფორმაციით, გზის მიმდებარედ ახალი სკვერის მშენებლობა იწყება.
ინფრასტრუქტურული სამუშაოების მიმდინარეობას ადგილზე აჭარის მთავრობის თავმჯდომარე თორნიკე რიჟვაძე და ბათუმის მერის მოვალეობის შემსრულებელი გაეცნენ.
„ბათუმში ძალიან აქტიურად მიმდინარეობს საგზაო ინფრასტრუქტურის მოწესრიგება, ძალიან მალე გაიხსნება მიმდებარე მონაკვეთი, წლის განმავლობაში დაგეგმილია ბაგრატიონის ქუჩის ბარცხანის ხიდის, გოგოლის ქუჩის რეაბილიტაცია. ეს ყველაფერი მნიშვნელოვანია ბათუმელებისთვის, ჩვენი სტუმრებისთვის და დარწმუნებული ვარ ინფრასტრუქტურის განვითარების და მშენებლობის კუთხით არაერთი პროექტის განხორციელება იქნება შესაძლებელი“, - განაცხადა მთავრობის თავმჯდომარემ.
აჭარის ავტონომიური რესპუბლიკის მთავრობის ცნობით, ჯავახიშვილის ქუჩის კეთილმოწყობა საგზაო ინფრასტრუქტურის რეაბილიტაციისა და კაპიტალური მშენებლობის ღონისძიების ფარგლებში მიმდინარეობს. მათი განმარტებით, აღნიშნულ მონაკვეთზე სანიაღვრე სისტემა KFW-ის პროექტით მოეწყო.
