ბათუმის საკრებულოს თავმჯდომარის სულიკო თებიძის განცხადებით, ბათუმის პლაჟის ოთხი ჰექტრის გადაცემის საკითხი დღის წესრიგიდან დროებით ამოიღეს. აღნიშნულ წინადადებას საკრებულოს დეპუტატთა უმრავლესობამ დაუჭირა მხარი. თებიძის თქმით, საკითხის განხილვა ბულვარის გენგეგმის დამტკიცების დროს მოხდება.

გადაწყვეტილებას „დაიცავი ძველი ბათუმის" წევრები გამოეხმაურნენ. როგორც ორგანიზაციის წევრმა ზეინაბ დიასამიძემ განაცხადა, ეს მცირე გამარჯვებაა, თუმცა ბულვარის დასაცავად ბრძოლას გააგრძელებენ.

„დღეს საკრებულოს წევრებს ეყოთ გონიერება, რომ დღის წესრიგიდან ამოეღოთ ბათუმის ბულვარში პლაჟის გასხვისების საკითხი. ათ დღეში პლაჟის განვითარების გენგეგმა ჩამოვა, რომელზეც მაღალი რანგის სპეციალისტები მუშაობენ, საკრებულოს თავმჯდომარემ გადაწყვიტა, რომ ვიდრე ეს გეგმა საჯაროდ განხილული არ იქნება, ეს საკითხი საკრებულოში აღარ განიხილება. დღევანდელი დღე მცირე გამარჯვებად შეიძლება ჩაითვალოს, თუმცა არ გავჩერდებით. ვიბრძოლებთ ბოლომდე, ბათუმის ბულვარი ეს არის პლაჟი - ძეგლი, ბათუმის სანაპირო ზოლი არის საჯარო ზონა, ქალაქის პლაჟი და ის კერძო საკუთრებაში არ იქნება. ჩვენ დიდ თანადგომას ვუდასტურებთ ბულვარის დირექტორს ირაკლი ჯინჭარაძეს, რადგან მასთან ერთად ბოლომდე ვიბრძოლებთ, მან დიდი მოქალაქეობრივი შეგნება გამოიჩინა და ასე უნდა იქცეოდნენ“, - განაცხადა ზეინაბ დიასამიძემ.