სარფში სხვადასხვა დასახელების არადეკლარირებული საქონელი გამოავლინეს. როგორც „ინტერპრესნიუსს“ ფინანსთა სამინისტროს შემოსავლების სამსახურიდან აცნობეს, მებაჟე ოფიცრების მიერ სარფში, საბაჟო გამშვებ პუნქტზე, ეჭვის საფუძველზე, საქართველოს მოქალაქის, ა.გ.-ს მართვის ქვეშ არსებული ავტომანქანის დეტალური დათვალიერების შედეგად, არადეკლარირებული საქონელი, კერძოდ, 1400 ღერი სიგარეტი, 20 კილოგრამი თამბაქო და სხვადასხვა დასახელების 43 ფლაკონი მედიკამენტი გამოვლინდა.
„საბაჟო კოდექსის 168-ე მუხლის მე-3 ნაწილის შესაბამისად, კანონდამრღვევ მოქალაქეს ჩამოერთვა საქონელი და სანქციის სახით, ფულადი ჯარიმა 1000 ლარის ოდენობით შეეფარდა“, - აღნიშნულია უწყების მიერ გავრცელებულ ინფორმაციაში.