ბათუმში, აღმაშენებლის ქუჩაზე "ერთიანი ნაციონალური მოძრაობის" ოფისთან ხმაურია. ერთმანეთს "ნაციონალური მოძრაობისა" და "ქართული ოცნების" აქტივისტები სიტყვიერად დაუპირისპირდნენ.

"ქართული ოცნების" აქტივისტები შენობაზე სტიკერების გაკვრას ცდილობდნენ, რასაც ხმაური მოჰყვა.

"ქართული ოცნების" აქტივისტების განცხადებით, მათ სამაგიერო გადაუხადეს "ერთიანი ნაციონალური მოძრაობის" წევრებს გუშინდელი ქმედებებისთვის.

კერძოდ, "ქართული ოცნების" აქტივისტის, გიორგი გიორგაძის განცხადებით, გუშინ "ნაცმოძრაობის" აქტივისტებმა "ქართული ოცნების" შენობაზე უმხამსი შინაარსის წარწერები გააკრეს. ამასთან, "ქართული ოცნების" წარმომადგენლებმა ადგილზე ცოცხები მიიტანეს.

"ნაციონალურ მოძრაობაში" კი აცხადებენ, რომ აღნიშნული დაგეგმილი პროვოკაციაა და ოპოზიციის წევრებს თავს ესხმიან.

ადგილზე ამ დროისთვის სიმშვიდეა. ტერიტორიაზე რჩებიან სამართალდამცველები.