სინოდმა კომისია შექმნა, დანარჩენი პატრიარქს რა შეუძლია და რა არ შეუძლია, ეს ალბათ, უშუალოდ პატრიარქის გადასაწყვეტია, - ამის შესახებ ფოთისა და ხობის მიტროპოლიტმა, მეუფე გრიგოლმა საკათედრო ტაძარში სადღესასწაულო ლიტურგიის დასრულების შემდეგ განაცხადა, რითაც უპასუხა ჟურნალისტის კითხვას, უნდა ჩაერიოს თუ არა საქართველოს პატრიარქი ჭყონდიდის ეპარქიაში მიმდინარე მოვლენებში.
მისი თქმით, ვიდრე სინოდში შექმნილი სპეციალური კომისია აღნიშნულ საკითხზე მუშაობას არ დაასრულებს, რაიმე სახის ღონისძიებების წინასწარ განხორციელება სასურველი არ არის.
„ამაზე მეტი ჩარევა რა გინდათ, სინოდმა კომისია შექმნა, დანარჩენი პატრიარქს რა შეუძლია და რა არ შეუძლია, ეს ალბათ, უშუალოდ პატრიარქის გადასაწყვეტია. მე ამ საკითხზე ჩემი აზრი გამოვთქვი არა როგორც ფოთის მღვდელმთავარმა ჭყონდიდის ეპარქიაზე, არამედ მე გამოვთქვი როგორც სინოდის წევრმა არსებულ პრობლემაზე და ეს სავსებით ბუნებრივია და ნორმალური არის. ადგილზე როგორ გაგრძელდება ვითარება, ეს მათ პასუხისმგებლობაზეა. თუმცა ვფიქრობ, რომ ვიდრე კომისია მუშაობას არ დაასრულებს, ნაკლებად სასურველია, რომ რაიმე ღონისძიებები წინსწრებით განხორციელდეს, რადგან კომისიის მუშაობამ შინაარსი უნდა შეიძინოს“, - აღნიშნა მეუფე გრიგოლმა.
მეუფე გრიგოლი იმედოვნებს, რომ კომისია სამუშაო პროცესში პასუხს გასცემს იმ კითხვებს, „რომლებსაც ჩვენ ეს პრობლემა გვთვაზობს და რომლის წინაშეც გვაყენებს“.
მეუფე გრიგოლის შეფასებით, ჭყონდიდის ეპარქიაში განვითარებული მოვლენები მხოლოდ ერთ ეპარქიას არ ეხება. მისი თქმით, აღნიშნული პრობლემა საფრთხეს უქმნის ეკლესიას.