ვფიქრობ მნიშვნელოვანია, რომ პოლიტიკურმა პარტიებმა იმუშაონ და არსებული სიტუაციიდან გამოსავალი ნახონ. ჩვენ ძალიან გვსურს, რომ მოლაპარაკებებში წინსვლა ვიხილოთ, - ამის შესახებ საქართველოში საფრანგეთის ელჩმა დიეგო კოლასმა განაცხადა.
მისი თქმით, საქართველოში არსებული პოლიტიკური კრიზისიდან გამოსავლის მოსაძებნად აუცილებელია, პარტიებმა კრისტიან დანიელსონის მიერ შეთავაზებულ წინადადებებზე კონსტრუქციულად იმუშაონ.
„დღეს საქართველო სერიოზული გამოწვევების წინაშე დგას, მათ შორის ჯანდაცვასთან დაკავშირებული კრიზისის, ეკონომიკური კრიზისის, სამხრეთ კავკასიაში არსებული სიტუაცია, ამიტომ მნიშვნელოვანია, რომ ქვეყნის მთელი ენერგია მობილიზებული იყოს ამ გამოწვევების გადასალახად. ამ კუთხით, ვფიქრობ, ძალიან მნიშვნელოვანია პოლიტიკური კრიზისის გადაჭრა. არსებობს ბატონი დანიელსონის მიერ შეთავაზებული წინადადებები, რომელიც მან მაგიდაზე დადო და მნიშვნელოვანია, რომ პარტიებმა კონსტრუქციულად იმუშაონ ამ წინადადებებზე იმისთვის რომ, გამოსავალი გამონახონ”, - განაცხადა ფრანგმა დიპლომატმა.