აჭარის ავტონომიური რესპუბლიკის უმაღლესი საბჭოს წევრებმა თავისუფლებისთვის ბრძოლაში დაღუპულ გმირთა ხსოვნას პატივი მიაგეს.

ამის შესახებ ინფორმაციას აჭარის ავტონომიური რესპუბლიკის უმაღლესი საბჭო ავრცელებს.

მათივე ინფორმაციით, 1989 წლის სისხლიანი მოვლენებიდან 32 წელი გავიდა, თუმცა ეს დღე იქცა თავისუფლების სიმბოლოდ და 1991 წლის 9 აპრილს გამოცხადდა საქართველოს დამოუკიდებლობის აღდგენის დღე.

„9 აპრილს, საქართველოს ისტორიისათვის უმნიშვნელოვანეს და, ამავდრულად, ჩვენი ქვეყნის დამოუკიდებლობის აღდგენის დღეს, აჭარის ავტონომიური რესპუბლიკის უმაღლესი საბჭოს წევრები ბათუმში, გმირთა ხეივანში შეიკრიბნენ.

აჭარის უმაღლესი საბჭოს წევრებმა - ტიტე აროშიძემ, ფატი ხალვაშმა, მარინე გვიანიძემ, დავით ბაციკაძემ, გიორგი მანველიძემ, ლადო მგალობლიშვილმა, უმაღლესი საბჭოს აპარატის წარმომადგენლებთან ერთად, ყვავილებით შეამკეს 9 აპრილის მემორიალი და წუთიერი დუმილით პატივი მიაგეს, თავისუფლებისთვის ბრძოლაში დაღუპულ გმირთა ხსოვნას”,- ნათქვამია გავრცელებულ ინფორმაციაში.