ქობულეთში, სოფელ გორგაძეებში მოსახლეობა საზოგადოებრივი ტრანსპორტის დანიშვნას ითხოვს. მათ ამ მოთხოვნით საპროტესტო აქცია გამართეს. მოსახლეობა ქობულეთის მერიას დახმარებას სთხოვს.

თავის მხრივ, ქობულეთის მერიაში აცხადებენ, რომ უწყება საკითხზე მუშაობს.

"ქობულეთის მერიის მუშაობით და ბათუმის მუნიციპალიტეტთან თანამშრომლობით დაახლოებით 2 წლის წინ, გორგაძეებში მოსახლეობის მოთხოვნის შესაბამისად დაინიშნა მიკროავტობუსი, თუმცა მგზავრთა ნაკადის სიმცირის გამო, მძღოლები უარს აცხადებდნენ ამ მიმართულებით მოძრაობაზე. ამ ეტაპზე მერია დამატებით მსჯელობს სუბსიდირების საკითხზე და შესაძლოა, ნაწილობრივ მერიის დაფინანსებით მოხდეს ხაზზე მუნიციპალური ტრანსპორტის ამოქმედება", -აცხადებენ მერიაში.