პარლამენტში ნდობის ჯგუფის სხდომა, სადაც სახელმწიფო დაცვის სპეციალური სამსახურის უფროსს ანზორ ჩუბინიძეს უსმენდნენ, დასრულდა. საკანონმდებლო ორგანო ანზორ ჩუბინიძემ მედიასთან კომენტარის გარეშე დატოვა.

სხდომაზე დეპუტატებმა 2020 წელს განხორციელებული საიდუმლო საქმიანობისა და სპეციალური პროგრამების შესახებ სახელმწიფო დაცვის სპეციალური სამსახურის მოხსენება მოისმენეს.

როგორც სხდომის დასრულების შემდეგ თავდაცვის კომიტეტის თავმჯდომარე ირაკლი ბერაიამ განაცხადა, სამსახურის საქმიანობა მაღალ შეფასებას იმსახურებს.

"სამსახური ეფექტიანად ახდენს დასაცავი პირების და ობიექტების უსაფრთხოების უზრუნველყოფას, ასევე საქართველოში ვიზიტად მყოფი მაღალი და უმაღლესი თანამდებობის პირების უსაფრთხოებას, მის საქმიანობას მაღალ შეფასებას აძლევენ ასევე საერთაშორისო პარტნიორები. ეს იყო ძალიან საინტერესო მოსმენა და გვქონდა ძალიან საინტერესო დისკუსია", - განაცხადა ბერაიამ.