ქუთაისში, პარლამენტის ყოფილ შენობასთან მოქალაქეები შეიკრიბნენ, რითაც „ნამახვანჰესის“ მშენებლობის წინააღმდეგ გუმათში მიმდინარე პროტესტს სოლიდარობას უცხადებენ.
ისინი ქუთაისიდან ავტომსვლელობით სოფელ გუმათისკენ გაემართებიან, სადაც „რიონის მცველებსა“ და აქციის სხვა მონაწილეებს შეუერთდებიან. მსვლელობა 14:00 საათზე უნდა დაიწყოს.
„ჩვენ ვართ რიგითი მოქალაქეები, ქუთაისელები. გუშინ ვნახეთ, რაც მოხდა. დილით უკვე ხეობის და სოფლის ოკუპაცია მოახდინეს. რაც იქ ხდება საშინელებაა. მონატრებული გვაქვს ისეთი საქართველო, როდესაც ყველა ერთად ვიდექით.
მაქსიმალურად მოვუწოდებთ მთელ ქვეყანას, მოდით და დაგვიდექით გვერდით ყველანაირი პოლიტიკური პარტიების გარეშე. შეხვალთ ისტორიაში და იამაყებთ იმით, რომ იბრძოდით თქვენი სამშობლოს მიწისთვის. ესაა მთავარი მესიჯი და არავინ გაბედოს, რომ „რიონის მცველებზე“ და იქ შეკრებილ ადამიანებზე იძალადოს“,- განაცხადა აქციის ერთ-ერთმა მონაწილემ, დავით კუხიანიძემ.
ცნობისთვის, პოლიციამ რიონის ხეობაში, „გუმათჰესთან“ რკინის ბარიკადები აღმართა. ამასთან, შეგახსენებთ, რომ „ნამახვანჰესის" მოწინააღმდეგეები გუშინ დღის მეორე ნახევარში „გუმათჰესის" მიმდებარე ტერიტორიიდან, სადაც კარვები ჰქონდათ გაშლილი, კომპანია „ენკას" ოფისთან გადავიდნენ. ისინი აცხადებდნენ, რომ კომპანიის კუთვნილ ავტომობილებს ტერიტორიაზე შესვლისა და სამუშაოების წარმოების საშუალებას არ მისცემდნენ. პროტესტის მონაწილეებმა ამ მიზნით, კორიდორიც გააკეთეს. ადგილზე ვითარება რამდენჯერმე დაიძაბა. სამართალდამცველები მათ მოუწოდებდნენ გზა გაეხსნათ და ტერიტორია გაეთავისუფლებინათ. გუშინ გვიან ღამით, შინაგან საქმეთა სამინისტროს თანამშრომლებმა, სოფელ გუმათში მიმდინარე საპროტესტო აქციაზე ადმინისტრაციულ სამართალდარღვევათა კოდექსის 173-ე მუხლით გათვალისწინებული სამართალდარღვევისთვის 6 პირი დააკავეს.