„რიონის ხეობის გადარჩენისთვის“ წევრები სოფელ გუმათიდან ქუთაისის მიმართულებით მიდიან, სადაც „ნამახვანჰესის“ მოწინააღმდეგეების აქცია მიმდინარეობს

„რიონის ხეობის გადარჩენისთვის“ წევრები სოფელ გუმათიდან ქუთაისის მიმართულებით მიდიან, სადაც „ნამახვანჰესის“ მოწინააღმდეგეების აქცია მიმდინარეობს.

მანამდე კი მათ სოფელ გუმათში აქცია გამართეს და „გუმათჰესთან“ აღმართულ რკინის ბარიკადებზე ხელების დარტყმითა და ხმაურით კიდევ ერთხელ გამოხატეს პროტესტი ჰესის მშენებლობასთან დაკავშირებით.

ამასთან, აქციის მონაწილეებმა ხელისუფლებას მოუწოდეს, რომ რკინის ბარიკადები ადგილიდან მოხსნან.

„ყველა მეთოდით ცდილობს უშიშროების სამსახური, რომ დაყოს და დაანაწევროს ჩვენი მოძრაობა, რომლის პრეცედენტი ბოლო ათწლეულია საქართველოში არ ყოფილა. ამიტომ, ჩვენ ვცდილობთ, რომ ვიაროთ იმ ვექტორზე, რომელიც თავიდანვე ავირჩიეთ და სუფთად გავყვეთ ამ ხაზს ყოველგვარ პოლიტიკურ ჯგუფებთან ან მათთან აფილირებული ადამიანებთან კავშირის გარეშე“, - აცხადებს „ნამახვანჰესის“ ერთ-ერთი მოწინააღმდეგე ვარლამ გოლეთიანი.