პარლამენტის დარგობრივი ეკონომიკისა და ეკონომიკური პოლიტიკის კომიტეტის წევრები ენგურის ჰიდროელექტროსადგურზე მიმდინარე სარემონტო-სარეაბილიტაციო სამუშაოებს გაეცნენ. მათ ენგურის კაშხალი, სადაწნეო გვირაბი, მთავარი გამყვანი არხი, ელექტრომექანიკური და ჰიდრომექანიკური მოწყობილობები დაათვალიერეს, რომლებზეც სარემონტო-სარეაბილიტაციო სამუშაოები მიმდინარეობს.

„ენგურჰესის“ სარეაბილიტაციო სამუშაოებზე მთლიანად 48 მლნ ევროს ღირებულების სამუშაოები შესრულდა და ჰესი მაისში სრული სიმძლავრით ამუშავდება.

დარგობრიბვი ეკონომიკისა და ეკონომიკური პოლიტიკის კომიტეტის თავმჯდომარის, დავით სონღულაშვილის თქმით, ენგურჰესის რეაბილიტაცია მნიშვნელოვანი ფაქტორია ჩვენი ქვეყნის დამოუკიდებლობისა და ეკონომიკის განვითარებისათვის.

„მინდა აღვნიშნო, რომ ქვეყნის დამოუკიდებლობისთვის ერთ-ერთი მდგენელია ენერგოდამოუკიდებლობა და სწორედ ენგურჰესისნაირი ჰესები მოგვცემენ იმის შესაძლებლობას, რომ შევძლოთ შევინარჩუნოთ ეს დამოუკიდებლობა და გავაძლიეროთ ქვეყნის ეკონომიკა“, - განაცხადა დავით სონღულაშვილმა.

დეპუტატებთან ერთად ენგურჰესის სარეაბილიტაციო სამუშაოები დაათვალიერეს საქართველოს ენერგეტიკის მარეგულირებელი კომისიის თავმჯდომარე დავით ნარმანიამ, ეკონომიკისა და მდგრადი განვითარების მინისტრის მოადგილე დავით თვალაბეიშვილმა.