აზიურ ფაროსანასთან ბრძოლის საკოორდინაციო მართვის ცენტრის უფროსმა, ლაშა შალამბერიძემ მავნებლის საწინააღმდეგოდ მიმდინარე და დაგეგმილი ღონისძიებები რაჭა-ლეჩხუმისა და ქვემო სვანეთის გუბერნატორთან, პაპუნა მარგველაძესთან ერთად განიხილა. ამის შესახებ ინფორმაციას სურსათის ეროვნული სააგენტო ავრცელებს.

მათივე ცნობით, შეხვედრაზე ხაზგასმით აღინიშნა, რომ მავნებლის საწინააღმდეგო ღონისძიებების მაქსიმალური ეფექტურობისთვის, უმნიშვნელოვანესია კოორდინირებული მუშაობა.

„დასავლეთ საქართველოში, მათ შორის რაჭის რეგიონში, მავნებლის გავრცელების არეალისა და მასშტაბის დადგენის მიზნით, მონიტორინგის სისტემები მონტაჟდება. აზიური ფაროსანას საწინააღმდეგო ღონისძიებების პირველ ეტაპზე დაგეგმილია წერტილოვანი წამლობები; მონიტორინგის შედეგების საფუძველზე, საჭიროების შემთხვევაში, ჩატარდება თერმული ნისლით წამლობა.

ფუტკრის დაცვის მიზნით, სააგენტოს სპეციალისტებმა საკონსულტაციო შეხვედრები მეფუტკრე ფერმერებთან გამართეს. მათ მავნებლის წინააღმდეგ დაგეგმილი ღონისძიებებისა და ფუტკრის დასაცავად შემუშავებული სახელმძღვანელო პრინციპების შესახებ დეტალური ინფორმაცია მიაწოდეს.

მეფუტკრეებს შესაძლებლობა აქვთ,რეგისტრაცია საკოორდინაციო მართვის ცენტრის ოფიციალურ ვებგვერდზე გაიარონ - www.parosana.ge. ასევე, SMS შეტყობინების მეშვეობით, წამლობის დაწყებისა და განხორციელების ვადებზე დეტალური ინფორმაცია მიიღონ”,- ნათქვამია ინფორმაციაში.