პენტაგონი - რუსეთს უკრაინის საზღვართან იმაზე მეტი ჯარი ჰყავს, ვიდრე 2014 წელს
რუსეთს უკრაინის საზღვართან იმაზე მეტი ჯარი ჰყავს მობილიზებული, ვიდრე 2014 წელს, - ამის შესახებ პენტაგონის პრესსპიკერმა ჯონ კირბიმ განაცხადა.
„ეს მობილიზება, რა თქმა უნდა, უფრო დიდია, ვიდრე 2014 წელს, რაც ძალიან შემაშფოთებელია“ , - აღნიშნა პენტაგონის ოფიციალურმა წარმომადგენელმა, თუმცა კონკრეტული რიცხვები არ დაუსახელებია.
მისი თქმით, რუსეთის მტკიცება, რომ ჯარების გადაადგილება წვრთნებში მონაწილეობის მიზნით ხდება, გაუგებარია.
”ჩვენ მოვისმინეთ რუსეთის განცხადება, რომ ეს ყველაფერი წვრთნებს ეხება. ჩვენთვის ბოლომდე გასაგები არ არის ის ფაქტი, რომ მიზანი სწორედ ეს არის,“- აღნიშნა ჯონ კერბიმ.
უკრაინის საზღვრებზე რუსეთის სამხედრო ძალების მობილიზებას დასავლეთი გმობს და მოსკოვს სიტუაციის დეესკალაციისა და ჯარის გაყვანისკენ მოუწოდებს. რუსეთის ხელისუფლება კიევს პროვოკაციებში ადანაშაულებს და აცხადებს, რომ ჯარის გადაადგილება დაგეგმილ სამხედრო წვრთნებს უკავშირდება.
