ქუთაისის მერმა იოსებ ხახალეიშვილმა მრჩეველთა საბჭო წარადგინა. მერის მრჩეველთა საბჭო საზოგადოების სხვადასხვა სფეროს წარმომადგენლებისგან შეირჩა. ამის შესახებ ინფორმაციას ქუთაისის მერია ავრცელებს.

მათივე ცნობით, საბჭოს წევრების წარდგენას სახელმწიფო რწმუნებული იმერეთში ზვიად შალამბერიძე, ქუთაისის საკრებულოს თავმჯდომარე ირაკლი შენგელია, მერის მოადგილეები ესწრებოდნენ.

„მერის მრჩეველთა საბჭოს წევრები წარვუდგინეთ საზოგადოებას. ესენი არიან თავიანთ საქმიანობებში წარმატებული ადამიანები, რომლებსაც ყველა ვიცნობთ და ვაფასებთ, არა მარტო ჩვენს ქალაქში, არამედ მის ფარგლებს გარეთაც. მადლობა მინდა ვუთხრა მრჩეველთა საბჭოს წევრებს, რომ გამოეხმაურნენ ჩვენს შეთავაზებას და გვერდით დაგვიდგნენ. დარწმუნებული ვარ, ჩვენი თანამშრომლობა ნაყოფიერი და წარმატებული იქნება“,- განაცხადა იოსებ ხახალეიშვილმა.