ქუთაისს დიდი ბრიტანეთის საგანგებო და სრულუფლებიანი ელჩი მარკ კლეიტონი ეწვია. ელჩს ქუთაისის მერმა იოსებ ხახალეიშვილმა და მერის მოადგილემ ირაკლი ქარქაშაძემ უმასპინძლეს.

ქუთაისის მერიის მიერ გავრცელებული ინფორმაციით, შეხვედრაზე ისაუბრეს ქართულ-ბრიტანულ ურთიერთობეზე, ქუთაისისა და ნიუპორტის მრავალწლიან მეგობრობასა და მომავლის გეგმებზე.

„დიდი ბრიტანეთის ელჩი მარკ კლეიტონი გვესტუმრა. ვისაუბრეთ ინგლისის ქალაქ ნიუპორტისა და ქუთაისის მეგობრობის შესახებ. განვიხილეთ მომავალი თანამშრომლობის საკითხები. ელჩი ასევე დაინტერესდა ქუთაისის საერთაშორისო უნივერსიტეტით. ბრიტანელი დიპლომატი მზადყოფნას გამოთქვამს ჩვენი ქალაქის, ასევე რეგიონის მუზეუმებთან მჭიდრო თანამშრომლობაზე. ეს მისი პირველი ოფიციალური ვიზიტია, თუმცა ის ქუთაისს მანამდეც სტუმრობდა ოჯახთან ერთად“, - განაცხადა იოსებ ხახალეიშვილმა.