ბოლო ორი კვირაა ეპიდემიოლოგიური მაჩვენებლები უარესდება. ამ ვითარებაში გაგვაჩნია საკმარისი რესურსი იმისთვის, რომ საჭიროების შემთხვევაში, ეტაპობრივად მოხდეს დამატებითი საწოლფონდის მობილიზება, - ამის შესახებ შიდა ქართლში მოქმედი სამედიცინო ქსელ „გორმედის“ დამფუძნებელმა გია სვანაძემ განაცხადა.

„მოგეხსენებათ, ბოლო ორი კვირაა, უარესდება ეპიდემიოლოგიური მაჩვენებლები. ამ ვითარებაში, ბუნებრივია, დღის წესრიგში დგება კლინიკების და საწოლფონდის მობილიზების საკითხი, თუმცა „გორმედის“ ქსელს წინასწარი მობილიზება არ სჭირდება. გაგვაჩნია საკმარისი რესურსი იმისთვის, რომ საჭიროების შემთხვევაში, ეტაპობრივად მოხდეს დამატებითი საწოლფონდის მობილიზება. მოგეხსენებათ, გასული თვეების პიკურ პერიოდში „გორმედმა“ სახელმწიფო 250 საწოლით უზრუნველყო, ამჟამად კი, ქსელის ერთი კლინიკა კვლავ მთლიანად ეთმობა კოვიდის მართვას. ჩვენ გაგვაჩნია საკმარისი როგორც ადამიანური, ისე ტექნიკური რესურსი იმისთვის, რომ საჭიროების შემთხვევაში, ეტაპობრივად მოხდეს შუალედურად 111 საწოლის მობილიზება, შემდგომ კი, პიკურად, გასული თვეების მაჩვენებელზე დაბრუნება - 250 საწოლის მობილიზება. მუდმივი კომუნიკაცია გვაქვს ჯანდაცვის სამინისტროსთან, დაავადებათა კონტროლის ეროვნულ ცენტრთან და რეგიონის გუბერნატორთან მოქმედ ოპერატიულ შტაბთან, სწორედ მათთან შეთანხმებით ხდება შემდგომი გადაწყვეტილებების მიღება“, - განაცხადა „გორმედის“ ქსელის დამფუძნებელმა გია სვანაძემ.

შეგახსენებთ, არსებული ეპიდემიოლოგიური ვითარების გათვალისწინებით, ჯანდაცვის სამინისტროს და დაავადებათა კონტროლის ეროვნული ცენტრის პროგნოზებით, კორონავირუსის შემთხვევების პიკურ პერიოდს ქვეყანა მაისის შუა რიცხვებში ელის.