ფრიდონ ფუტკარაძე სამაჟორიტარო ოლქში დედამიწის დღისადმი მიძღვნილ ღონისძიებებში მონაწილეობდა
აჭარის ავტონომიური რესპუბლიკის გარემოს დაცვისა და აგრარულ საკითხთა კომიტეტის თავმჯდომარე ფრიდონ ფუტკარაძე ხელვაჩაურის მუნიციპალიტეტში, “დედამიწის დღისადმი” მიძღვნილ ღონისძიებებში მონაწილეობდა.
როგორც „ინტერპრესნიუსს“ აჭარის ავტონომიური რესპუბლიკის მთავრობიდან აცნობეს, ეს დღე სოფელ ჭარნალის საჯარო სკოლის მოსწავლეებმა და ამავე სკოლის ადმინისტრაციის წარმომადგენლებმა დასუფთავების აქციით აღნიშნეს.
მათი ინფორმაციით, მუნიციპალიტეტის საბავშვო ბაღების გაერთიანების ინიციატივით, ახალსოფლის საბავშვო ბაღის ეზოში ხელვაჩაურის 18 სკოლამდელი აღზრდის დაწესებულების აღსაზრდელთა ნახატების გამოფენა მოეწყო.
„ხულოს, ქედის, შუახევისა და ხელვაჩაურის მაჟორიტარმა დეპუტატმა, ფრიდონ ფუტკარაძემ ღონისძიების მონაწილეებს „დედამიწის დღე“ მიულოცა და აღნიშნა, რომ როგორც აგრარულ და გარემოს დაცვის საკითხთა კომიტეტის თავმჯდომარე, სამომავლოდაც აქტიურად ჩაერთვება მსგავს აქციებში. ღონისძიება დაჯილდოებით დასრულდა, მუნიციპალიტეტის საბავშვო ბაღებს გაწეული საქმიანობისთვის მადლობის სიგელები გადაეცათ“,-აღნიშნულია ინფორმაციაში.
