ბათუმის მაჟორიტარი დეპუტატი აჭარის უმაღლეს საბჭოში, საკანონმდებლო ორგანოს თავმჯდომარის მოადგილე ტიტე აროშიძე მოსახლეობასთან შეხვედრებს აგრძელებს. როგორც „ინტერპრესნიუსს“ აჭარის უმაღლესი საბჭოდან აცნობეს, უმაღლესი საბჭოს წევრი ამჯერად ბარათაშვილის ქუჩის მცხოვრებლებს შეხვდა და მათთან ერთად განიხილა მოსახლეობისთვის მნიშვნელოვანი საკითხები.

შეხვედრაზე იმყოფებოდნენ მუნიციპალური სერვისების სააგენტოს დირექტორის მოადგილე ირაკლი დევაძე, ამავე სააგენტოს წარმომადგენლები და სერვისცენტრის მენეჯერი მამუკა გოგიტიძე, რომლებმაც ადგილზევე ჩაინიშნეს შეხვედრაზე გამოთქმული მოსაზრებები და წინადადებები.

ქალაქში მიმდინარე ინფრასტრუქტურული, სოციალური, ჯანდაცვისა და სხვა პროგრამების პარალელურად, ყურადღება გამახვილდა მოახლოებულ ტურისტულ სეზონზე.

ტიტე აროშიძის განცხადებით, ტურისტული პოლიტიკის მაქსიმალური ხელშეწყობა იყო, არის და იქნება ხელისუფლების ერთ-ერთი პრიორიტეტი.