მესამე ტალღის დარტყმისგან დამცავი საშუალება და ერთადერთი ინსტრუმენტი არის იგივე, რაც აქამდე გვქონდა - ნიღაბი, ხელების დამუშავება და დისტანცირება, - ამის შესახებ დღეს პარლამენტში, ვიცე-სპიკერმა დავით სერგეენკომ განაცხადა.

მისივე თქმით, ვაქცინაციის პროცესს ჯერ ისეთი შედეგები ვერ ექნება, რომ დაცვითი ფუნქცია შეასრულოს. როგორც სერგეენკომ განმარტა, ამისთვის საჭიროა მოსახლეობის ნახევარზე მნიშვნელოვნად მეტი ორჯერადად იყოს აცრილი, რასაც ჩვენ წლის ბოლოსთვის მივაღწევთ.

"მეც კარგად ვაცნობიერებ, რომ მოსახლეობისთვის მომაბეზრებელი და შეიძლება დამძაბავია ინფორმაცია, რომელსაც ექიმები, ეპიდემიოლოგები ავრცელებენ. მეორე მხრივ, თვალი უნდა გავუსწოროთ რეალობას. აპრილ-მაისში მთელი მსოფლიო მესამე ტალღის მოლოდინშია. მესამე ტალღის გამომწვევია ვირუსის ბუნების ცვლილება და მისი ახალი ნაირსახეობების, ახალი შტამის გამოჩენა, რომელიც უფრო გადამდებია. სამწუხაროდ, საქართველო გამონაკლისი ვერ გახდება. ის რაც მთელ მსოფლიოშია, მისი გამოძახილი არის საქართველოშიც. ჯანდაცვის სისტემის ამოცანაა, ეს ზიანი შეძლებისდაგვარად შეამციროს და დარტყმა შეარბილოს", - განაცხადა დავით სერგეენკომ.