ოკუპირებული აფხაზეთიდან გადმოსვენებული მეომარი ლევან მემანიშვილი ბოლნისში, სამხედრო პატივით დაკრძალეს

ოკუპირებული აფხაზეთიდან გადმოსვენებული მეომარი ლევან მემანიშვილი დღეს ბოლნისში სამხედრო პატივით დაკრძალეს. ლევან მემანიშვილის დაკრძალვამდე სამოქალაქო პანაშვიდი სასაფლაოს მიმდებარედ არსებულ ღვთისმშობლის სახელობის ტაძარში გაიმართა, სადაც ბოლნელმა მთავარეპისკოპოსმა ეფრემმა სამხედროს სულის მოსახსენიებელი პანაშვიდი გადაიხადა. აღნიშნულ ინფორმაციას ბოლნისის მუნიციპალიტეტის მერია ავრცელებს.

„შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატისა და წითელი ჯვრის საერთაშორისო კომიტეტის ძალისხმევით, 1992-1993 წლებში აფხაზეთის შეიარაღებული კონფლიქტის შედეგად დაღუპული მებრძოლის, ვახტანგ გორგასლის II ხარისხის ორდენის მფლობელი სამხედროს, ლევან მემანიშვილის ნეშტის იდენტიფიცირება გახდა შესაძლებელი. დაღუპული მეომრის ოჯახის გადაწყვეტილებით, ლევან მემანიშვილის ნეშტი, მის მშობლიურ ქალაქ ბოლნისში, სამხედრო პატივით დაიკრძალა.

აფხაზეთში დაღუპულ მეომარს ბოლნისელებთან ერთად პატივი ბოლნისის მუნიციპალიტეტის მერმა დავით შერაზადიშვილმა და ბოლნისის, დმანისის, თეთრიწყაროსა და წალკის დეპუტატმა გოგი მეშველიანმა მიაგეს.

იმ ადგილას, სადაც დღეს ლევან მემანიშვილი დაიკრძალა, ბოლნისის მუნიციპალიტეტის გადაწყვეტილებით, უახლოეს მომავალში ძმათა სასაფლაო და მემორიალი მოეწყობა.

აღსანიშნავია, რომ ლევან მემანიშვილის გარდა, საქართველოს მთავრობისა და წითელი ჯვრის საერთაშორისო კომიტეტის ძალისხმევით, 1992-1993 წლების შეიარაღებული კონფლიქტის შედეგად, უგზო-უკვლოდ დაკარგული კიდევ 12 პირის იდენტიფიცირება მოხერხდა. ოკუპირებული აფხაზეთიდან გადმოსვენებული პირების სამოქალაქო პანაშვიდი 23 აპრილს სამების საკათედრო ტაძარში გაიმართა”,- აღნიშნულია გავრცელებულ ინფორმაციაში.

ბოლნისის მუნიციპალიტეტის მერის, დავით შერაზადიშვილის თქმით, 14 უგზო-უკვლოდ დაკარგული ბოლნისელი მებრძოლიდან ჯერ მხოლოდ ლევან მემანიშვილის ნეშტის იდენტიფიცირება მოხერხდა.

„აფხაზეთის ომმა არაერთი ბოლნისელის სიცოცხლე შეიწირა, მათ შორის ჩემი უახლოესი მეგობრების, ამიტომ ეს დღე ჩემთვის განსაკუთრებით ემოციური და სიმბოლურია. უგზო-უკვლოდ დაკარგული 14 ბოლნისელი მებრძოლიდან საქართველოს მთავრობისა და წითელი ჯვრის საერთაშორისო კომიტეტის ძალისხმევით, ჯერ მხოლოდ ლევან მემანიშვილის ნეშტის იდენტიფიცირება მოხერხდა. დღეს ჩვენი გმირი თანამემამულე მის მშობლიურ ქალაქში, სამხედრო პატივით დავკრძალეთ,სადაც უახლოეს მომავალში ძმათა სასაფლაო და მემორიალი მოეწყობა. ეს დღე ტკივილიანი და ამავე დროს სასიხარულოცაა, რადგან ჩვენ, თითოეულ ბოლნისელს საშუალება გვაქვს ლევანს დამსახურებული პატივი მივაგოთ. იმედი მაქვს, რომ უგზო-უკვლოდ დაკარგული გმირების იდენტიფიცირება აქტიურად გაგრძელდება. ჩვენი მოვალეობაა არასდროს დავივიწყოთ საქართველოს ტერიტორიული ერთიანობისა და თავისუფლებისთვის დაღუპული გმირები. მჯერა, მათი თავგანწირვა შედეგს აუცილებლად გამოიღებს და ერთ დღესაც, ყველანი ერთად, ერთიან და განვითარებულ საქართველოში ვიცხოვრებთ“, - განაცხადა დავით შერაზადიშვილმა.

კორნელი კაკაჩია - თუ ადგილობრივ არჩევნებში გახარიასა და ვასაძის პარტიები მიიღებენ მონაწილეობას, „ქართულ ოცნებას“ პროპორციული სისტემით  ხმების 43%-ის აღება გაუჭირდება
ქართული პრესის მიმოხილვა 17.05.2021
პაველ ფელგენგაუერი - ისრაელ-პალესტინის ზავის პირობები დამოკიდებული იქნება იმაზე, ისრაელი ღაზის სექტორს „ჰამასისაგან“ სრულად გაწმენდს და მოისურვებს თუ არა ამჯერად მასზე კონტროლის აბასის ადმინისტრაციისთვის გადაცემას
“მეამა ქოლექთის” ყავის უნიკალური კოქტეილები ბათუმშია