მარტვილში, სოფელ სალხინოს ღვთისმშობლის შობის ტაძრის შესასვლელთან კიდევ ერთი დაპირისპირება მოხდა. სასულიერო პირების ნაწილი ჭყონდიდელ მიტროპოლიტს, მეუფე სტეფანეს ტაძარში შესვლის საშუალებას არ აძლევდა.
მეუფე სტეფანე ტაძარში პოლიციის დახმარებით შევიდა.
მანამდე, სალხინოს ღვთისმშობლის შობის ტაძრის ეზოში სიტყვიერი და ფიზიკური დაპირისპირება მოხდა. სიტუაცია მეუფე სტეფანესა და სასულიერო პირების, რომელთაც მეუფე სტეფანემ მღვდელმსახურება შეუჩერა, მხარდამჭერებს შორის მას შემდეგ დაიძაბა, რაც სალხინოს ღვთისმშობლის შობის ტაძრის ეზოში ბიზნესმენი კლიმენტი კეკუტია გამოჩნდა. დაპირისპირებული მხარე კეკუტიას მოსახლეობის მიწების მითვისებაში ადანაშაულებდა. სწორედ მას უკავშირებენ ჭყონდიდის ეპარქიაში განვითარებულ მოვლენებს.
ტაძარის ეზოში იმყოფებიან "ნამახვანჰესის" მშენებლობის წინააღმდეგ მიმდინარე აქციის მონაწილეებიც.