ჭყონდიდის მიტროპოლიტმა მეუფე სტეფანემ, სალხინოს ღვთისმშობლის შობის სახელობის ტაძარი, სპეციალურად მოწყობილი კორდონის საშუალებით დატოვა.

მას დღეს მომხდარი ინციდენტის შესახებ მედიასთან კომენტარი არ გაუკეთებია, თუმცა მან ქადაგებისას აღნიშნა, რომ მედიიის კითხვებს დღეიდან წერილობით უპასუხებს, რადგან, მისივე თქმით, მას მხოლოდ კითხვებს უსვამენ და პასუხს არ უსმენენ.

მრევლის ნაწილმა ის შეძახილებით "ჩვენ გვიყვარს მეუფე" გააცილა.

ცნობისთვის, მარტვილში, ღვთისმშობლის შობის ტაძრის ეზოში, ბზობის დღესასწაულთან დაკავშირებით, საზეიმო წირვის დაწყებამდე სიტყვიერი და ფიზიკური დაპირისპირება იყო. სასულიერო პირების ნაწილმა, რომელიც ჭყონდიდელ მიტროპოლიტ, მეუფე სტეფანეს არ ემორჩილება, ტაძარში ადგილობრივი ბიზნესმენის კლიმენტი კეკუტიას გამოჩენა გააპროტესტეს, შემდეგ კი მეუფე სტეფანეს ტაძრის შესასვლელთან დახვდნენ. მეუფე სტეფანე ტაძარში პოლიციის დახმარებით შევიდა. მომხდარზე შსს-მ გამოძიება 126-ე მუხლით დაიწყო, რაც ცემას გულისხმობს.