ნიკა მელიას გასათავისუფლებად არც გირაო და არც ამნისტია არ არის საპირწონე. არანაირად არ შეიძლება ეს ორი საკითხი დავუკავშიროთ მის გათავისუფლებას, - ასე აფასებს ,,ნაციონალური მოძრაობის” წევრი ლევან ბეჟაშვილი ამნისტიის კანონპროექტის გზით პარტიის თავმჯდომარე ნიკა მელიას გათავისუფლებას.

მისი განცხადებით, ასევე დაუშვებელია ამნისტია ვრცელდებოდეს იმ პირებზე, ვინც 20 ივნისის ღამეს არაპროპორციული ძალა გამოიყენა.

„სამ პოლიციელზე ახლაა აღძრული საქმე, მაგრამ ამნისტიის მიღების შემთხვევაში ყველაზე, მათ შორის მაღალი თანამდებობის პირებზეც გავრცელდება. შეთანხმება მისი კეთილსინდისიერი განმარტებით ამას არ ითვალისწინებს, ამიტომ დაველოდებით ხვალ რა გადაწყვეტილებას მიიღებს დარჩენილი ოპოზიცია, რომელიც შევიდა პარლამენტში.

ნიკა მელიას გასათავისუფლებად არც გირაო და არც ამნისტია არ არის საპირწონე, არანაირად არ შეიძლება ეს ორი საკითხი დავუკავშიროთ მის გათავისუფლებას. მაგრამ, ევროპარლამენტარების თავდებობა და სისხლის სამართლის კოდექსის 70-ე მუხლი, რომელიც ითვალისწინებს, რომ პროკურატურას ვითარების შეცვლის გამო შეუძლია შეწყვიტოს სისხლის სამართლის საქმე, ეს ორი საფუძველი არის აბსოლუტურად გამართული, კონსტიტუციის შესაბამისი და თუ ხელისუფლებას მართლაც სურს პოლიტიკური კრიზისის დასრულება, უნდა მიიღოს ეს გადაწყვეტილება”, - აღნიშნა ლევან ბეჟაშვილმა.