აჭარის უმაღლესი საბჭოს საკონსტიტუციო, იურიდიულ და საპროცედურო საკითხთა კომიტეტის თავმჯდომარემ ლადო მგალობლიშვილმა უმაღლესი საბჭოს ბიუროს სხდომაზე საქართველოს პარლამენტში წარსადგენი საკანონმდებლო ინიციატივა - "გრანტების შესახებ" საქართველოს კანონში ცვლილებების თაობაზე" წარადგინა.
როგორც „ინტერპრესნიუსს“ აჭარის უმაღლესი საბჭოდან აცნობეს, კანონპროექტის თანახმად, ავტონომიურ რესპუბლიკებში საჯარო სამართლის იურიდიულ პირებს მიეცემათ გრანტის გაცემის უფლებამოსილება დასაქმებისა და ახალგაზრდულ სფეროებში, რაც მნიშვნელოვნად შეუწყობს ხელს შესაბამისი მიმართულებით საქმიანობის ეფექტურობის გაზრდას.
მათივე ინფორმაციით, ეს პირველი საკანონმდებლო ინიციატივაა, რომლის თანახმად, ავტონომიურ რესპუბლიკებში საჯარო სამართლის იურიდიულ პირებს კონკრეტულ სფეროებში მიანიჭებათ გრანტის გაცემის უფლებამოსილება.
მათივე ცნობით, კანონპროექტის ინიციატორები უმაღლესი საბჭოს წევრები - ვლადიმერ მგალობლიშვილი და დავით გაბაიძე არიან.