ხშირ შემთხვევაში ისე ხდება, რომ სამოქალაქო სექტორი — მადლობა ღმერთს, ყველა არა, თუმცა მათი ნაწილი, ნებსით თუ უნებლიედ, არა ჩვენი ქვეყნის კეთილმოსურნე ძალების მხარეს, არამედ დამნაშავე პიროვნებების უაპელაციოდ დაცვის მხარედ გვევლინება, - ეს განცხადება პარლამენტის ტრიბუნიდან სახელმწიფო უსაფრთხოების სამსახურის უფროსმა გრიგოლ ლილუაშვილმა გააკეთა.
“ეს ხშირ შემთხვევაში, აქეზებს, სტიმულს აძლევს და მოტივაციას უქმნის დანაშაულის განმეორებით ჩადენას და მოტივაციას უზრდის დანაშაულის ჩამდენ პირებს, რადგან რიგ შემთხვევებში, მათ დამცველებათ “უზარმაზარი რეპუტაციის” მქონე უფლებადამცველი ორგანიზაციები და კონკრეტული პირები ევლინებიან. ამიტომ მნიშვნელოვანია, როგორც მოსახლეობასთან, ასევე არასამთავრობო სექტორთან რაც შეიძლება მეტი ახსნა-განმარტებითი დიალოგის წარმოება. უფრო მეტი ინფორმაციის მიცემა. არსებობს დახურული თემები, მაგრამ არსებობს თემები, რომელთა გახსნაც შეიძლება. ყოველთვის გამოვთქვამთ ურთიერთთანამშრომლობის მზაობას”, - განაცხადა ლილუაშვილმა პარლამენტის პლენარულ სხდომაზე, სუს-ის 2020 წლის საქმიანობას ანგარიშის განხილვისას.
ლილუაშვილის თქმით, მნიშვნელოვანია, სამოქალაქო სექტორთან თანამშრომლობა, რის გარეშეც არაფერი გამოვა.
როგორც ლილუაშვილმა აღნიშნა, სუს-მა შეძლო “არაჩვეულებრივი ურთიერთობები დაემყარებინა რაციონალურ ექსპერტებთან, რომლებიც არ გამოირჩევიან ყალბი, ცრუ ინფორმაციის გავრცელებით და გააჩნიათ ხედვები ქვეყნის უსაფრთხოების უკეთესი ჩარჩოს ჩამოსაყალიბებლად“.