ყველაფერს ვაკეთებთ სხვადასხვა უწყებებთან და საერთაშორისო პარტნიორებთან ერთად, რომ მაქსიმალურად შემჭიდროვებულ ვადებში მოვახდინოთ უკანონოდ დაკავებული პირების გათავისუფლება , - ამის შესახებ სახელმწიფო უსაფრთხოების სამსახურის უფროსმა გრიგოლ ლილუაშვილმა პარლამენტში 2020 წლის შემაჯამებელი ანგარიშის წარდგენის დასრულების შემდეგ მედიასთან განაცხადა.

მისი თქმით, ოკუპირებულ ტერიტორიაზე უკანონო პატიმრობაში მყოფი პირების გათავისუფლების პროცესში სხვა უწყებებთან ერთად ჩართულები არიან საერთაშორისო პარტნიორები.

„რა თქმა უნდა, გრძელდება ოკუპაციის პროცესი, რასაც რუსული სამხედრო მანქანა ახორციელებს ჩვენი ქვეყნის ინტერესების საწინააღმდეგოდ. ამას თან ამძიმებს სიტუაცია, რომელსაც ჰქვია უკანონო ბორდერიზაცია და ჩვენი მოქალქეების უკანონო დაპატიმრება. ყველაფერს ვაკეთებთ სხვადასხვა უწყებებთან და საერთაშორისო პარტნიორებთან ერთად მაქსიმალურად შემჭიდროვებულ ვადებში მოვახდინოთ უკანონოდ დაკავებული პირების გათავისუფლება. ამაში ჩართულები არიან ჩვენი საერთაშორისო პარტნიორები და მათი მხარდაჭერით ვცდილობთ ზემოქედება მოვახდინოთ არასწორ რეჟიმზე, რომელიც უკანონოდ აკავებს მშვიდობიან მოსახლეობას“ , - განაცხადა ლილუაშვილმა.