„რუსთავის აზოტის“ თანამშრომლები მეოთხე დღეა ხელფასების 50%-ით გაზრდის მოთხოვნით, საპროტესტო აქციას მართავენ. მათ საწარმოს ცენტრალური შესასვლელი აქვთ ბლოკირებული. 2000-მდე თანამშრომელი მეოთხე დღეა გაფიცულია, რამაც „აზოტის" წარმოების სრული გაჩერება გამოიწვია. დღეისათვის „რუსთავის აზოტში“ მხოლოდ ჟანგბადის საამქრო ფუნქციონირებს, საიდანაც სამედიცინო დაწესებულებების ჟანგბადით მომარაგება ხდება.
გაფიცული მუშები მოითხოვენ, მათი შრომითი ანაზღაურება დირექციამ მინიმუმ 50%-ით გაზარდოს და მეორე მოთხოვნაა, რომ საპროტესტო აქციების მონაწილე პირები სამსახურიდან არ გაათავისუფლონ.
აციის მონაწილეებთან ცოტა ხნის წინ, რუსთავის მერი ირაკლი ტაბაღუა მივიდა. ის გაფიცულ მუშებს დირექციასთან მოლაპარაკების პროცესში მედიატორის სახით ჩართვას დაპირდა.
აქციის მონაწილეები აცხადებენ, რომ პროტესტს, მოთხოვნის შესრულებამდე არ შეწყვეტენ.