ბათუმში, აეროპორტის გზატკეცილზე, საერთაშორისო გადაზიდვებზე დასაქმებულმა მძღოლებმა საპროტესტო აქცია გამართეს. როგორც შეკრებილებმა ჟურნალისტებს განუცხადეს, ისინი თურქეთიდან ტრასპორტირების ნებართვის მოპოვებას ითხოვენ. როგორც აქციის მონაწილეები აცხადებენ, სახმელეთო ტრანსპორტის სააგენტოში აღნიშნული პროცედურის გავლა რთულია და ვის ეძლევა ნებართვა დაუდგენელია.

აქციის მონაწილეების თქმით, მძღოლების ნაწილს დატვირთული ტრაილერები უკვე გაჩერებული აქვს და ითხოვენ გადაადგილებას, რადგან დატვირთული საქონელი ფუჭდება.

აქციის მონაწილეების თქმით, ყაზახეთში საქართველოს რამდენიმე მოქალაქე ოთხი ათასი ლარით უკვე დააჯარიმეს.

თავის მხრივ, სახმელეთო ტრასპორტის სააგენტოში აცხადებენ, რომ ყაზახეთში დაჯარიმებულ მძღოლებთან დაკავშირებით უწყება მუშაობს.

აქციის მონაწილეების თქმით, თუ მათი მოთხოვნები არ დაკმაყოფილდება, ფართომასშტაბიან აქციებს დაიწყებენ.