შატილისკენ მიმავალ გზაზე პროექტით გათვალისწინებული ყველა სამუშაო დასრულებულია გეოლოგიური შესწავლის შესაბამისი ხარისხით, ქვათა ცვენა კი წლევანდელი ხანგრძლივი ზამთრის შემდეგ, სტიქიური მოვლენის შედეგად განვითარდა, რაზეც რეაგირება მყისიერად მოხდა, - ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ განაცხადა.

მისი თქმით, ჟინვალი-ბარისახო-შატილის გზის გაწმენდითი და დაზიანებული მონაკვეთების აღდგენითი სამუშაოები გრძელდება და ყველა საჭირო რესურსის გამოყენებით დასრულდება.

ინფრასტრუქტურის სამინისტროს ცნობით, ამ ეტაპზე, ჟინვალი-ბარისახო-შატილის გზა 90-ე კმ-მდეა გაწმენდილი, სადაც სუსტი გრუნტების გამო ჩამოშლილია დიდი ოდენობით შვავი და კლდის მასა. მათივე ინფორმაციით, მონაკვეთი სპეციალისტების მიერ გაცემული რეკომენდაციების შესაბამისად აღდგება და საავტომობილო გზა, სავარაუდოდ, 2 კვირაში გაიხსნება.