ამნისტიის კანონისგან განსხვავებით, „საარჩევნო კოდექსის" განხილვისას გარემო არის უფრო კონსტრუქციული, პრინციპულ საკითხებთან დაკავშირებით თითქმის გვაქვს თანხმობა, - ამის შესახებ მმართველ გუნდთან „საარჩევნო კოდექსში" შესატანი ცვლილებების განსახილველად გამართული სამუშაო შეხვედრის დასრულების შემდეგ „სტრატეგია აღმაშენებლის" წევრმა პაატა მანჯგალაძემ განაცხადა.
მისივე თქმით, შეხვედრისას მხოლოდ ორ საკითხთან დაკავშირებით იყო აზრთა სხვადასხვაობა.
„დღეს იყო სამუშაო შეხვედრა საარჩევნო კოდექსთან დაკავშირებით. ამნისტიის კანონისგან განსხვავებით, გარემო არის უფრო კონსტრუქციული, უფრო პრინციპულ საკითხებთან დაკავშირებით თითქმის გვაქვს თანხმობა. არის ცესკო-ს თავმჯდომარის მოადგილის საკითხი, რომელსაც შარლ მიშელის დოკუმენტი ითვალისწინებს. ამაზე არის აზრთასხვადასხვაობა, მაგრამ მგონია, რომ ამაზეც შევთანხმდებით“, - განაცხადა მანჯგალაძემ.
ამასთან, მისივე თქმით, ოპოზიცია არ ეთანხმება იმას, რომ „ევროპელ სოციალისტებს" „პატრიოტთა ალიანსის" ნაცვლად ცესკო-ში წევრის ყოლის შესაძლებლობა მიეცეს.
„სულ ეს ორი საკითხია, მაგრამ არ მგონია, რომ ხელისუფლებას ამ საკითხებზეც პრინციპული პოზიცია ჰქონდეს და შესაძლებელია შევთანხმდეთ. შესაძლებელია, რომ მომავალი კვირიდან კომიტეტებში განხილვა დაიწყოს. არის მოსაზრება, რომ დაველოდოთ ვენეციის კომისიის დასკვნას და არის მოსაზრება, რომ სავალდებულო კომიტეტებმა განიხილოს, ამაზეა საუბარი", - განაცხადა მანჯგალაძემ.