“გირჩის” ლიდერის იაგო ხვიჩიას განცხადებით, საარჩევნო რეფორმასთან დაკავშირებით რამდენიმე საკითხი კვლავ დისკუსიის საგანია, რაზე შეთანხმება კანონპროექტის საკომიტეტო მოსმენებზე განხილვისას მოხდება. როგორც ხვიჩიამ ჟურნალისტებს განუცხადა, ოპოზიციასა და მმართველ გუნდს შორის დისკუსია ეხება არა პრინციპულ საკითხებს, არამედ ტექნიკურ დეტალებს.

“მიმდინარეობს ამ კანონპროექტის მუხლობრივი განხილვა. საკითხების უმეტესობაზე კონსენსუსის მიღწევა შესაძლებელია. მაგრამ არსებობს საკითხები, რომლებიც საკომიტეტო მოსმენებზე განიხილება და კომიტეტებზე იქნება კონსენსუსი. დისკუსია მაინც თავისი შინაარსით არის არა რაღაც პრინციპული უთანხმოების საკითხებზე, არამედ იმაზე, როგორ ჯობია ტექნიკურად რაღაცების დალაგება. კონკრეტული თემა, რაც პრინციპული დისკუსიის საგანია, სულ რამდენიმეა და ესეც არაა ისეთი მნიშვნელობის, რაც შეთანხმებას ხელს შეუშლის. ოპოზიცია და ხელისუფლება საკომიტეტო მოსმენების დროს კიდევ უფრო დავაახლოვებთ პოზიციებს და შესაძლებელი გახდება ამ კანონპროექტის კონსენსუსით გატანა. სულ რამდენიმე მუხლია, რომელიც საკამათოა”,- განაცხადა ხვიჩიამ.

გარდა ამისა, როგორც ხვიჩიამ განაცხადა, მისი პოზიციაა, რომ ცესკო-ს თავმჯდომარეს ორი მოადგილე ჰყავდეს - ერთი პროფესიული ნიშნით დანიშნული, რომელიც არჩევნებზე საჭიროების შემთხვევაში თავმჯდომარის მოვალეობას შეასრულებს და მეორე - პარტიული. მისი თქმით, რეფორმაზე მომუშავე ჯგუფი სწორედ ამ პრინციპის გაზიარებისკენ მიდის.

“მე მქონდა მოადგილეებთან დაკავშირებით პოზიცია, ყველას ინტერესი რომ იყოს გათვალისწინებული და არ იყოს შეთანხმებაც დარღვეული, იყოს ორი მოადგილე, ერთი პროფესიული და მეორე პარტიული ნიშნით და საარჩევნო პერიოდში საჭიროების შემთხვევაში თავმჯდომარის მოვალეობა პროფესიულმა მოადგილემ შეასრულოს. სხვა შემთხვევაში არსებობდეს ოპოზიციის მიერ დანიშნული მოადგილეც, რომელიც მშვიდობიანობის დროს ასრულებს თავმჯდომარის მოვალეობასაც. ვფიქრობ, საბოლოოდ, მაინც ამ პრინციპის გათვალისწინებისკენ მიდის პროცესი, თუმცა ამაზე გადაწყვეტილება ჯერ არ მიგვიღია. ვფიქრობ, საბოლოო შეთანხმება საკომიტეტო მოსმენებზე მოხდება”,- განაცხადა ხვიჩიამ.