„ნამახვანჰესის“ მშენებლობის ერთ-ერთი მოწინააღმდეგის, მარიტა მუსელიანის განცხადებით, საეჭვოა მართლაც „ნამახვანჰესის“ მოწინააღმდეგეებმა დააზიანეს თუ არა სოფელ გუმათთან აღმართული რკინის ჯებირი, რასთან დაკავშირებითაც შსს-მ გამოძიება დაიწყო. როგორც მარიტა მუსელიანი აცხადებს, „რიონის ხეობის მცველები" ჯებირებს მხოლოდ ხელებს ურტყამდნენ და პროტესტს ამგვარად გამოხატავდნენ.
„ცოტა ხნის წინ გავეცანი შსს-ს ამ განცხადებას და გვედავებიან ორ ადგილას ჯებირის კუთხის გადაკეცვას. ჯებირი საერთოდ არ შეიძლება აქ იდგეს და შეუძლებლად მეჩვენება ვინმეს შეედავო მისი კიდის გადაკეცვაზე. ეს ცოტა აბსურდულად მეჩვენება. კიდევ ერთი ეჭვი მაქვს და საკითხავია, მართლა გადმოკეცეს თუ არა აქციის მონაწილეებმა ეს გვერდი, იმიტომ, რომ ჩვენ აქ ამ პროცესს ვესწრებოდით და იმ დროის განმავლობაში ჯებირზე ხელების ბრახუნი იყო. ჩვენი მოწოდება არ იყო კიდეების გადმოკეცვა, ჩვენს თვალწინ ეს არ გადმოკეცილა, ამას ბევრი ადამიანი ვესწრებოდით. გამოძიების საგანიც ეს არის და მართლაც საინტერესოა, აქციის მონაწილემ გადმოკეცა ნამდვილად თუ არა, მაგრამ მებისმიერ შემთხვევაში, საერთოდ აბსურდია ვინმე გვედავებოდეს ისეთი ჯებირის დაზიანებას, რომელიც საერთოდ არ შეიძლება არსებობდეს ბუნებაში“, - აცხადებს მუსელიანი.
დაიბარა თუ არა აქციის რომელიმე მონაწილე შსს-მ გამოკითხვაზე, მუსელიანი აცხადებს, რომ გამოკითხვებთან დაკავშირებით ჯერჯერობით არაფერი იცის.