დღეს საქართველო არის რეფორმებზე ორიენტირებული და ევროკავშირთან ასოცირებული მნიშვნელოვანი პარტნიორი, – ამის შესახებ ევროპის საგარეო ქმედებათა სამსახურის ევროპული რუსეთის, აღმოსავლეთ პარტნიორობის და ცენტრალური აზიის საკითხების დირექტორმა ლუკ პიერ დევინმა EURACTIV-ის მიერ ორგანიზებულ კონფერენციაზე : საქართველოს გზა ევროკავშირისკენ: რა არის შემდეგი? - განაცხადა.
მან საქართველოში ბოლო დროს არსებულ პოლიტიკურ კრიზისა და 19 აპრილის შეთანხმების მნიშვნელობაზე ისაუბრა.
„ჩვენ ვიცით, რომ ბოლო დროს საქართველოში იყო ღრმა პოლიტიკური კრიზისი. ევროკავშირის შუამავლობით მიღწეული 19 აპრილის შეთანხმება სთავაზობს საქართველოს წინსვლის გზას, თუმცა იმ პირობით, რომ საქართველოს პოლიტიკური ძალები დეპოლარიზაციის გზას მიჰყვებიან. პოლარიზაცია არის პოლიტიკური ცხოვრების ნაწილი, მაგრამ მან არ უნდა გამოიწვიოს ინსტიტუტების პარალიზება, მათ შორის ისეთი მნიშვნელოვანი ინსტიტუტის, როგორც პარლამენტია.
შეთანხმება მოხდა რამდენიმე რეფორმაზე, მსურს ხაზი გავუსვა ორ მათგანს ეს არის მართლმსაჯულების რეფორმა და საარჩევნო რეფორმა. მართლმსაჯულების რეფორმას, რომელიც ძალიან მნიშვნელოვანია, სამწუხაროდ, ჯერ კიდევ გრძელი გზა აქვს გასავლელი. ხშირად თვლიან, რომ მართლმსაჯულების დამოუკიდებლობა, რაც ცხადია მნიშვნელოვანია, ნიშნავს, რომ მართლმსაჯულება არ არის ანგარიშვალდებული. სინამდვილეში ეს ასე არ არის. დამოუკიდებელი მართლმსაჯულება უნდა იყოს ანგარიშვალდებულიც. თუ არსებობენ არკომპეტენტური ან, უფრო უარესიც, კორუმპირებული მოსამართლეები, უნდა არსებობდეს გზები ამის აღმოსაფხვრელად. სამწუხაროდ, 26 მაისს ვნახეთ რიგი ნაბიჯებისა და დანიშვნებისა, რაც არ წარმოადგენდა სწორი მიმართულებით გადადგმული ნაბიჯს”, - აღნიშნა ლუკ პიერ დევინმა.
მისი თქმით, საქართველოს პროგრესისთვის მნიშვნელოვანია ფუნქციონალური დემოკრატიის ჩამოყალიბება.
„ფუნციონირება კი ნიშნავს, რომ არსებობს განსხვავებული მოსაზრებები, დებატები, ოპოზიცია თუმცა ყველა საკითხი უნდა გადაიჭრას ინსტიტუტების ფარგლებში და არა გარეთ“, – განაცხადა ლუკ პიერ დევინმა.