ნინოწმინდის ბავშვთა პანსიონში განვითარებულ მოვლენებთან დაკავშირებული საპროტესტო აქცია მთავრობის ადმინისტრაციასთან დასრულებულია.

როგორც აქციაზე შეკრებილები აცხადებენ, თვეზე მეტია სახალხო დამცველს საპატრიარქოს დაქვემდებარებაში მყოფი “ჯავახეთის ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონში” არ უშვებენ.

აქციის ორგანიზატორების განცხადებით, სახელმწიფო დღემდე არ უზრუნველყოფს კანონის აღსრულებას და ქმედით ნაბიჯებს არ დგამს პრობლემის მოსაგვარებლად. ასევე, მათივე თქმით, დღემდე უცნობია რა მდგომარეობაში არიან ბავშვები მაშინ, როცა სახალხო დამცველის ბოლო მონიტორინგზე დაყრდნობით არსებობს საფუძვლიანი ეჭვი, რომ ნინოწმინდის პანსიონში ბავშვები განიცდიან ფსიქოლოგიურ და ფიზიკურ ძალადობას.

აქციის მიმდინარეობისას მოძრაობა „დროას“ წევრებს მოქალაქეების გარკვეული ჯგუფი დაუპირისპირდა, რომლებიც აცხადებენ, რომ აქციის მონაწილეები გარყვნილების და ლგბტ თემის პროპაგანდისტები არიან. დაპირისპირების შედეგად სამართალდამცველებმა აქციის ორი მონაწილე ტერიტორიას განარიდეს.