მამუკა ხაზარაძე - თბილისის მერი არ უნდა იყოს არცერთი პარტიის წარმომადგენელი, ის უნდა იყოს მეურნე ადამიანი - მივმართავ ყველა ოპოზიციონერ ლიდერს და პარტიას, მოდით ამ იდეის გარშემო დავიწყოთ ფიქრი

თბილისის მერი არ უნდა იყოს არცერთი პარტიის წარმომადგენელი, ის უნდა იყოს მეურნე ადამიანი, - ამის შესახებ "ლელოს" ლიდერმა მამუკა ხაზარაძემ განაცხადა.

მამუკა ხაზარაძე მიმართავს ყველა ოპოზიციონერ ლიდერს და პარტიას, რომ ამ იდეის გარშემო დაიწყონ ფიქრი.

"დღეს პირველად მომიწევს ჩემი და "ლელოს" იდეის გაჟღერება. მინდა კარგად ავხსნა, რა პოზიცია გვაქვს ამასთან დაკავშირებით.

ჩვენ უნდა გავაკეთოთ ყველაფერი სხვანაირად ვიდრე აქამდე ვაკეთებდით, მხედველობაში მყავს ოპოზიცია. დავისახოთ რამდენიმე კონკრეტული მიზანი. სტრატეგიული, შემოდგომის არჩევნების მიზანი, არის ის რომ " ქართულმა ოცნებამ" 43 % ვერ დააგროვოს. ეს არის სტრატეგიული მიზანი რადგან 2022-ში ქვეყანაში დაინიშნოს რიგგარეშე საპარლამენტო არჩევნები.

ეს არის საშუალება იმისა რომ ქვეყანას მოევლინოს კოალიციური მთავრობა და ამ კოალიციური მთავრობის პირობებში ქვეყანამ დადოს ქვეყნის განვითარების მნიშვნელოვანი, სტრატეგიული გეგმა.

ჩვენ ძალიან სერიოზული გამოცდა გველოდება შემოდგომაზე. ვფიქრობ ჩვენი ფორმულა არის შემდეგი. ჩვენ უნდა ჩავატაროთ გენერალური რეპეტიცია, ადგილობრივ არჩევნებზე და ჩვენს ამომრჩეველს ვაჩვენოთ, თუ როგორ შეიძლება თბილისის მაგალითზე ჩვენ კოალიციური მმართველობა გვქონდეს.

ამ ყველაფრისთვის საჭიროა, ოპოზიციური პარტიების ლიდერებმა უარი თქვან საკუთარი კანდიდატურის წამოყენებაზე მერობის პოსტზე. თუ მხოლოდ თბილისის განლაგებას ავიღებთ, ეს არ უნდა იყოს ერთი მოცემულობა რომ ერთმა ოპოზიციური პარტიის ლიდერმა დაუჭიროს მეორე ოპოზიციური პარტიის ლიდერს მხარი. ეს არ იმუშავებს და ჩვენ დავკარგავთ იმ ამომრჩეველს რომელიც ოპოზიციურად არის განწყობილი

გამოსავალი არის შემდეგი - თბილისი უფრო მეტია ვიდრე პოლიტიკა. თბილისს სჭირდება ძალიან სერიოზული განვითარების გეგმა. ამაში არ ვგულისხმობ ლურჯი ან ყვითელი ავტობუსების ჩამოყვანას. დაიღალა ხალხი იმის მოსმენით, რომ კიდევ ახალი ავტობუსები ჩამოდის ქალაქში.

თბილისს უნდა დაუბრუნდეს ფუნქცია, საერთაშორისო მნიშვნელობის ქალაქად უნდა ვაქციოთ თბილისი, უამრავი პარამეტრის მიხედვით. თბილისის თავი, ანუ მერი, არ უნდა იყოს არცერთი პარტიის წარმომადგენელი, ის უნდა იყოს მეურნე ადამიანი.

მეურნე ადამიანი, რომელსაც მთელი ოპოზიციური სპექტრი, დაუდგება გვერდში და დაეხმარებიან იმ პროგრამის განხორციელებაში, რომელსაც ოპოზიციური პარტიები ერთობლივად შეიმუშავებენ. სხვა შემთხვევაში იქმნება ალიაქოთი და დაპირისპირება.

ჩვენ გვავიწყდება მთავარი, ჩვენი ქალაქი, მისი ქუჩა, მოშიმშილე ბავშვები, დაბინძურებული მტკვარი. ამ ყველაფერს ერთი პარტიის ძალისხმევა და ერთი ლიდერი არ ეყოფა, თუ ძალები არ გავაერთიანეთ.

მეურნე ადამიანი უნდა იყოს ზეპარტიული, ან ძალიან დიდი კომპანიის ხელმძღვანელი, ან უცხოეთში ჩვენი, რომელიმე წარმატებული ადამიანი, რომელსაც ვეტყვით, რომ ჩვენ დავუდგებით გვერდში, გეგმას დავდებთ და ერთხელ პრეცედენტს დავუშვებთ რომ გავაკეთებთ საქმეს, როგორც არ ვაკეთებდით 30 წლის განმავლობაში.

მე მინდა მივმართო ყველა ოპოზიციონერ ლიდერს და პარტიას, რომ მოდით ამ იდეის გარშემო დავიწყოთ ფიქრი. ჩემთვის მთავარი მერობა კი არ არის, ჩემთვის მთავარია რა შეგვიძლია ჩვენ ამ ქალაქისთვის გავაკეთოთ", - აცხადებს ხაზარაძე.

ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს
ქართული პრესის მიმოხილვა 11.08.2022
გიორგი კუნაძე - რუსეთის რეჟიმის  კრახი გარდაუვალია, დღეს უკვე ცხადად ჩანს, რომ ეს მხოლოდ დროის საკითხია
საქართველოს უძრავი ქონების პირველად ბაზარზე ფასების ცვლილების დინამიკა 2022 წლის ზაფხული (R)
სს ლიბერთი ბანკის საცალო საბანკო საქმის მიმართულების დირექტორად თორნიკე კორძაია დაინიშნა
USAID-ის პროგრამის ,,დამსაქმებლები პროფესიული განათლებისთვის’’ და  ,,ტრანსფორდის“ ერთობლივი ინიციატივით 43 ადამიანი დასაქმდა