ევროსაბჭოს საპარლამენტო ასამბლეის მონიტორინგის კომიტეტის დელეგაცია პარტია ქართული ოცნების თავმჯდომარე ირაკლი კობახიძეს შეხვდა.

შეხვედრას ესწრებოდნენ ასევე პარლამენტის საგარეო ურთიერთობა კომიტეტის თავმჯდომარე ნიკოლოზ სამხარაძე, პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი, პარლამენტის განათლების კომიტეტის თავმჯდომარე შალვა პაპუაშვილი.

შეხვედრაზე ძირითადად, საუბარი შეეხო შარლ მიშელის დოკუმენტს, თუმცა, როგორც ირაკლი კობახიძემ ჟირნალისტებთან განაცხადა, მათ ასევე სხვა პოლიტიკური საკითხებიც განიხილეს.

"გვქონდა საუბარი ყველა თემაზე, მათ შორის მიშელის დოკუმენტიდან გამომდინარე ყველა თემაზე, ეს იყო საარჩევნო რეფორმის, სასამართლო რეფორმის საკითხები. ყველა საკითხზე გვქონდა საუბარი რაც უკავშირდება არა მხოლოდ მიშელის დოკუმენტს, ასევე სხვა საკითხებსაც, რომელიც დაკავშირებულია საპარლამენტო და ზოგად პოლიტიმურ დღის წესრიგთან.

რვა პარტიიდან, რომელმაც საარჩევნო ბარიერი გადალახა, ოთხს შარლ მიშელის დოკუმენტზე ხელი არ მოუწერია. რაც შეეხება შარლ მიშელის დოკუმენტის შესრულებას, ეს არის ჩვენი პასუხისმგებლობა. ამ დოკუმენტს ბოლომდე მივყვებით და თავიდან ბოლომდე შესრულდება. ამ თვალსაზრისით არანაირი პრობლემა არ იქნება", - განაცხადა კობახიძემ.

ცნობისათვის, დღის განმავლობაში დელეგაციის წევრები ასევე შეხვდნენ საპარლამენტო ოპოზიციას. გუშინ დელეგაციის წევრები შეხვდნენ პარლამენტის თავმჯდომარეს კახა კუჭავას, ევროპის საბჭოს საპარლამენტო ასამბლეაში საქართველოს დელეგაციის

წევრებს და იურიდიულ საკითხთა კომიტეტის თავმჯდომარე ანრი ოხანაშვილს. დელეგაცია საქართველოში 2 დღიანი ვიზიტით იმყოფება, ამ ხნის განმავლობაში ისინი საქართველოში არსებული მდგომარეობის შესახებ ინფორმაციას მოისმენენ, რის შემდეგაც ქვეყნის შესახებ ანგარიშს მოამზადებენ.