"ნამახვანჰესის" მოწინააღმდეგეები ორშაბათს, 7 ივნისს, სოფელ გუმათიდან ქუთაისში, ჰესის მშენებელი კომპანიის "ენკას" ოფისის, მიმართულებით მსვლელობას გამართავენ. შესაბამისი განცხადება გუმათში აქციების ერთ-ერთმა ორგანიზატორმა ვარლამ გოლეთიანმა განაცხადა.

მისივე თქმით, მსვლელობა 14:00 საათზე დაიწყება. მან მოსახლეობას მოუწოდა, შეუერთდნენ მსვლელობას. გოლეთიანის განცხადებით, მანამე გაგრძელდება გუმათში პროტესტი.

ამასთან, გოლეთიანის განცხდებით, 12 ივნისს, თბილისში ევროკავშირის წარმომადგენლები ჩამოვლენ და შეხვედრა გაიმართება, რომელშიც „რიონის ხეობის მცველებიც“ მიიღებენ მონაწილეობას.

„შემდეგ შაბათს ევროკავშირის წარმომადგენლები ჩამოდიან თბილისში და იქნება პირველი შეხვედრა, სადაც ჩვენც მივიღებთ მონაწილეობას, მოვისმენთ სამინისტროებისგან, რა იქნება პასუხი ამ პირობების შესრულებაზე. ყოველ შემთხვევაში, ევროკაშვირის ენერგო თანამეგობრობის წარმომადგენლები დადებენ დასკვნას მთელ ამ პროცესთან დაკავშირებით. თუ უარს ეტყვიან სამინისტროები და ხელისუფლება პირობების შესრულებაზე, ბუნებრივია, მათ დასკვნაში ეს ყველაფერი აისახება, იქნება კრიტიკული და უარყოფითი, რასაც დიდი მნიშვნელობა აქვს. პრაქტიკულად, დადასტურდება კიდევ ერთხელ ის, რასაც ჩვენ ამ ხნის განმავლობაში ვამბობთ. თუკი, შეასრულებენ პირობებს, შეწყდება სამუშაოები, გაიწერება კალენდარი, დავსხდეთ დიალოგის მაგიდასთან და იქ ვთქვათ, რატომ არ უნდა აშენდეს, რატომ მიგვაჩნია ასე და რატომ არის ენეგროპოლიტიკა გადასახედი ამ ქვეყანაში“, - განაცხადა გოლეთიანმა.

ამ დროისთვის "ნამახვანჰესის" მოწინააღმდეგეები ტრადიციულად ბარიკადებს ხელებს ურტყამენ და ამ ფორმით აპროტესტებენ ჰესის მშენებლობას ხეობაში.

შეგახსენებთ, "ნამახვანჰესის" მშენებლობას "რიონის ხეობის მცველები" უკვე 221-ე ღამეა აპროტესტებენ.