დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ივლისიდან ოქტომბრამდე ქვეყანაში კორონავირუსის 3 მლნ 200 ათასზე მეტი დოზა ვაქცინა შემოვა.

როგორც გამყრელიძე აღნიშნავს, ვაქცინებთან დაკავშირებით გლობალური დეფიციტია.

„მოგეხსენებათ, ვაქცინებთან დაკავშირებით გლობალური დეფიციტია. აქამდე ქვეყანამ ვაქცინის 315 ათასი დოზა მიიღო, რომლის ადმინისტრირებაც ხდება. ივლისი-აგვისტო-სექტემბერი-ოქტომბერი უკვე გადაწყვეტილია, არსებობს ძალიან მაღალი დასტური, რომ დაახლოებით 3 მლნ 200 ათასზე მეტი ვაქცინის დოზა შემოვა“,-აღნიშნავს გამყრელიძე.

ამირან გამყრელიძემ სენატორ ჯინ შაჰინის განცხადებაზეც ისაუბრა, რომლის თანახმადაც, ამერიკის შეერთებული შტატები საქართველოს კორონავირუსის ვაქცინებს გადასცემს. გამყრელიძე არ აკონკრეტებს, რომელი წარმოების ვაქცინას გამოუყოფს ამერიკის შეერთებული შტატები საქართველოს, თუმცა დასძენს, რომ „დიდი ალბათობით, ერთ-ერთი ამერიკული წარმოების ვაქცინის რამდენიმე ათეულ ათას დოზას მივიღებთ, ეს იქნება ზაფხულში“.