რუსთავის მერს ახალი მოადგილე ჰყავს. რუსთავის მერიის ინფორმაციით, ქალაქის მერის მოადგილის თანამდებობაზე, დავით იშხნელი დაინიშნა. ახალი მოადგილე, რუსთავის მერმა ირაკლი ტაბაღუამ, დღეს მერიის სამსახურების უფროსებს ოფიციალურად წარუდგინა.

როგორც რუსთავის მერმა ირაკლი ტაბაღუამ განაცხადა, დავით იშხნელი პროფესიონალი და გამოცდილი კადრია, სწორედ ამ კრიტერიუმით მოხდა მისი შერჩევა და აღნიშნულ თანამდებობაზე დანიშვნა.

ქალაქის მერის ახალი მოადგილე - დავით იშხნელი, 2014 წლიდან რუსთავის მუნიციპალიტეტის საკრებულოს წევრია. 2014-2017 წლებში, მეხუთე მოწვევის საკრებულოს პროპორციული წესით არჩეული დეპუტატი, 2017 წლიდან კი მეექვსე მოწვევის საკრებულოს მაჟორიტარი დეპუტატი და სოციალურ საკითხთა კომისიის თავმჯდომარე იყო.

დავით იშხნელი პროფესიით ექიმია და სამედიცინო სფეროში საქმიანობის მრავალწლიანი გამოცდილება აქვს.

„სოციალური პრობლემები, რაც დღეს არის ჩემთვის უცხო არ არის, მოგეხსენებათ, საკრებულოს სოციალურ საკითხთა კომისიას ვხელმძრვანელობდი. მომავალში ვგეგმავ იმ გეზის გაგრძელებას რაც აქამდე იყო, ოღონდ გაფართოვდება ჩართულობა ბავშვთა და მოზარდთა ზრუნვის კუთხით, მათი დაავადებების მართვისა და პროფილაკტიკის მიმართულებით. საკადრო ცვილებებს არ ვგეგმავ, მე ვენდობი იმ გუნდს, რომელიც მუშაობს და დარწმუნებული ვარ მათ კომპეტენტურობაში“, - განაცხადა დავით იშხნელმა.