ისნის საოლქო საარჩევნო კომისიის თავმჯდომარის, თედორე გობეჯიშვილის გარდაცვალების საქმესთან დაკავშირებით ბრალდებულ აკაკი კობალაძის განცხადებით, მას გობეჯიშვილზე ზეწოლა არ განუხორციელებია.

კობალაძის თქმითვე, გარდაცვლილი მისი უახლოესი მეგობარი იყო.

"მე და თედო გობეჯიშვილი ბავშვის მეგობრები ვიყავით, თედოს უფროსი შვილის ნათლია ვარ, 45 წლის ვარ და 14 წლიდან ერთად გვაქვს ცხოვრება გატარებული, მხარდამხარ მოვდიოდით ერთად. ჩემგან ზეწოლა თედოზე არ განხორციელებულა, თედო ადვილად დასაჩაგრი ადამიანი არ იყო. იმ დღეს, დილის 8:00 საათამდე ვქეიფობდით, მერე სახლში წავიდა და ოჯახის წევრები ამბობენ, რომ სახლშიც კარგ ხასიათზე მივიდა", - განაცხადა კობალაძემ.

კიდევ ერთი ბრალდებულის, აკაკი ხუსკივაძის განცხადებით, საქმეზე მტკიცებულებები დარღვევებით არის მოპოვებული.

"თითქოს, პოლიტიკური ნიშნით ვიღაცის დაკვეთით ვმოქმედებდით, როცა საარჩევნო ექსპერტი ხარ, ყველა პოლიტიკურ ძალასთან გაქვს კავშირი. გარდაცვლილის ბავშვის ნათლია ვიყავი და ჩემთვის მიუღებელია ის ფაქტი, რომ თითქოს, მას ვაშინებდით. ნებისმიერი მტკიცებულება საშინელი დარღვევით იქნა მოპოვებული, მათ შორის, ჩხრეკები",- განაცხადა ხუსკივაძემ.

ცნობისთვის, თედორე გობეჯიშვილის გარდაცვალების ფაქტთან დაკავშირებით, ორი პირი, აკაკი ხუსკივაძე და აკაკი კობალაძე დააკავეს. მათ სისხლის სამართლის კოდექსის 150-ე, 151-ე და 339-ე მუხლებით გათვალისწინებული დანაშაულის ჩადენას ედავებიან, რაც

იძულებას, მუქარასა და ქრთამის შეთავაზებას გულისხმობს.