ქართველი მხატვარი, თეატრისა და კინოს რეჟისორი, მწერალი რეზო გაბრიაძე ანჩისხატის ტაძრიდან გამოასვენეს.
ის ტაძრიდან ტაშით გააცილეს. რეზო გაბრიაძეს მთაწმინდის პანთეონში დაკრძალავენ.
რეზო გაბრიაძის სამოქალაქო პანაშვიდი დღეს ანჩისხატის ტაძარში მიმდინარეობდა. პანაშვიდზე იმყოფებოდნენ ხელისუფლების და ოპოზიციის წარმომადგენლები.
რეზო გაბრიაძის ოჯახს მიუსამძიმრა პრემიერ-მინისტრმა ირაკლი ღარიბაშვილმა, დედაქალაქის მერმა კახა კალაძემ, "ქართული ოცნების" თამჯდომარე ირაკლი კობახიძემ, საქართველოს კულტურის, სპორტისა და ახალგაზრდობის მინისტრმა თეა წულუკიანმა, პარლამენტის თავმჯდომარე კახა კუჭავამ და საპარლამენტო უმრავლესობის წევრებმა.
რეზო გაბრიაძე 6 ივნისს გარდაიცვალა. მხატვარი, თეატრისა და კინოს რეჟისორი, მწერალი და მოქანდაკე რეზო გაბრიაძე 1936 წელს ქუთაისში დაიბადა. ის 35-ზე მეტი ფილმის ავტორია, რომელთა შორის არის „მიმინო“, „არ იდარდო“, „ქინ ძა ძა“, „შერეკილები“, „არაჩვეულებრივი გამოფენა“, „სამნი გზაზე“ და ა.შ. 1981 წელს რეზო გაბრიაძემ თბილისში დაარსა მარიონეტების თეატრი, რომელმაც პირველივე სპექტაკლიდან დაიპყრო მაყურებელთა გულები და დღეს თეატრი მთელ მსოფლიოში მოგზაურობს.
რეზო გაბრიაძე მრავალი საერთაშორისო ჯილდოს მფლობელია, მათ შორის არის საფრანგეთის რესპუბლიკის ხელოვნებისა და ლიტერატურის კომანდორის ორდენი, სსრკ სახელმწიფო პრემია, პრემიები – „ნიკა“, „ტრიუმფი“, „ოქროს ნიღაბი“, „ოქროს სოფიტი“, „ცარსკოსელსკაია პრემია“, შ. რუსთაველის სახელობის სახელმწიფო პრემია და ა.შ.