„სტრატეგია აღმაშენებლის“ გენერალური მდივნის პაატა მანჯგალაძის განცხადებით, საარჩევნო კოდექსში ცვლილებები საჭიროა და დღეს არსებული პარლამენტი გასასწორებელია. როგორც მან პარლამენტის სხდომაზე აღნიშნა, ერთხელ და სამუდამოდ საჭიროა, რომ ქვეყანას ანგარიშვალდებული და პასუხისმგებლიანი მთავრობა ჰყავდეს.
„თურმე საარჩევნო კოდექსში ცვლილებები საჭირო ყოფილა და ეს გაითვალისწინა შარლ მიშელის დოკუმენტმა. სასამართლო რეფორმაზე შეთანხმებული ვართ, რომ სასამართლო არ არის ისეთი, როგორიც ქვეყანას სჭირდება, გენერალურ პროკურორზეც შეთანხმებული ვართ, პროპორციულ სისტემაზეც შევთანხმდით, რომ მომდევნო არჩევნები უნდა ჩატარდეს პროპორციული სისტემით და უფრო მეტიც, ახლა რომ ყოფილიყო პროპორციული სისტემით არჩევნები, თქვენ უმრავლესობა კი არ იქნებოდით გაყალბების მიუხედავად, თქვენ იქნებოდით უმცირესობა, რადგან თქვენს წინააღმდეგ უფრო მეტმა ხალხმა მისცა ხმა, ვიდრე აიღეთ. ეს არის ყველაზე დიდი უსამართლობა, რომ პარტიამ, რომელმაც აიღო ცხრაასი ათასი ხმა ჰქვია, „უმრავლესობა“ და „უმცირესობა“ ეწოდება იმ ჯგუფს, რომელმაც გაყალბების მიუხედავად მოიპოვა ერთ მილიონზე მეტი მოქალაქის ხმა. სწორედ ამიტომ ვართ პარლამენტში შემოსული, რომ ეს დანაშაული და უსამართლობა აღმოვფხვრათ. ერთხელ და სამუდამოდ საჭიროა ამ ქვეყანას ანგარიშვალდებული და პასუხისმგებლიანი მთავრობა ჰყავდეს“, -განაცხადა პაატა მანჯგალაძემ.
ინფორმაციას „სტრატეგია აღმაშენებლის“ პრესსამსახური ავრცელებს.