თუ „ქართული ოცნება“ არ აპირებს შეიტანოს ცვლილებები მის მიერ წარმოდგენილ ამნისტიის კანონპროექტში, ჩვენ მივცემთ წინააღმდეგ ხმას, ეს არის ის ინსტრუმენტი, რომელიც გაგვაჩნია ოპოზიციას, - ამის შესახებ ფრაქცია „ლელო - პარტნიორობა საქართველოსთვის" ერთ-ერთმა ლიდერმა, ბადრი ჯაფარიძემ ამნისტიის კანონპროექტზე საუბრისას განაცხადა.

მისი თქმით, ალტერნატიული კანონპროექტი, რომელიც დაარეგისტრირა ოპოზიციამ, არის სრულ თანხმობაში მიშელის შეთანხმებასთან და იმ წინადადებასთან, რომელიც იყო შემოთავაზებული მოდერატორების მხრიდან.

„ვერავინ იტყვის, რომ საუბარი იყო ფართო ამნისტიაზე, ან ჩვენ ვიმსჯელეთ 20-21 ივნისის მოვლენებზე და ამის შედეგად შევთანხმდით ამნისტიაზე, ეს ასე არ იყო. ამნისტიის ცნება გაჩნდა იმისათვის, რომ შემწყდარიყო სისხლის სამართლებრივი დევნა ნიკა მელიას მიმართ. ჩვენ სხვა ინსტრუმენტი გარდა იმისა, რომ წინააღმდეგ მივცეთ ხმა არ გვაქვს, აბსოლუტურად დამაზიანებლად მიგვაჩნია, რომ არ მოხდა გათვალისწინება ჩვენ მიერ შეთავაზებული კანონპროექტის”, - აღნიშნა ბადრი ჯაფარიძემ.