საქართველოს საგარეო საქმეთა მინისტრის პირველმა მოადგილემ ლაშა დარსალიამ გაერთიანებული სამეფოს საგანგებო და სრულუფლებიანი ელჩი მარკ კლეიტონი მიიღო.
ბრიტანელმა დიპლომატმა ლაშა დარსალიას დაწინაურება მიულოცა და ახალი საკურაციო მიმართულებით წარმატებები უსურვა.
როგორც საგარეო საქმეთა სამინისტროს ინფორმაციაშია აღნიშნული, შეხვედრის ფარგლებში, ყურადღება გამახვილდა ნატო-ს 14 ივნისის სამიტის შედეგებზე. კერძოდ, მხარეები მიესალმნენ კომუნიკეში გაჟღერებულ გზავნილებს, როგორც საქართველოს გაწევრიანების, ასევე თავად ალიანსის ტრანსფორმაციის კუთხით.
მათივე ინფორმაციით, განსაკუთრებული აქცენტი გაკეთდა საქართველოს ოკუპირებულ ტერიტორიებზე არსებულ ვითარებასა და ჟენევის საერთაშორისო მოლაპარაკებების მიმდინარეობაზე. ამ კონტექსტში, ლაშა დარსალიამ ხაზი გაუსვა საერთაშორისო თანამეგობრობის კონსოლიდირებული პოზიციის მნიშვნელობას.
მხარეებმა ასევე განიხილეს რეგიონში არსებული უსაფრთხოების კომპლექსური გარემო და აღნიშნეს თავდაცვისა და უსაფრთხოების სფეროში თანამშრომლობის შემდგომი გაღრმავების საჭიროება.