ურეკში პოლიციელებზე თავდასხმის საქმეზე დაკავებული 13 პირის ოჯახის წევრებმა და ახლობლებმა ცენტრალური მაგისტრალი გადაკეტეს. სამართალდამცველები ცდილობდნენ გზის გათავისუფლებას, რასაც აქციის მონაწილეებსა და პოლიციას შორის ხმაური მოჰყვა.

აქციის მონაწილეების განაცხადებით, ამ დროისთვის დაკავებული 13 პირი უკანონო პატიმრობაში არიან და უნდა გათავისუფლდნენ.

„13 ახალგაზრდაა დაკავებული. იყვნენ მაშველები, გადაარჩინეს 42 ადამიანის სიცოცხლე. რაღაც ინციდენტი მოხდა და ყველას ერთნაირი სასჯელი მისცეს. იქნება აქციები, არ გავჩერდებით, სანამ ჩვენს ახლობლებს სათანადო ყურადღებას არ მიაქცევენ. ბიჭების გათავისუფლებას ვითხოვთ“, - განაცხადა აქციის ერთ-ერთმა მონაწილემ.

სასამართლომ ურეკში პოლიციელებზე თავდასხმის საქმეზე დაკავებულ 13 პირს აღკვეთის ღონისძიების სახით პატიმრობა შეუფარდა.