„საქართველოს ახალგაზრდა იურისტთა ასოციაცია” (საია) 5 ივლისს დაზარალებული 11 ჟურნალისტის საქმეში უკვე ჩაერთო. მათი ინფორმაციით, ამ დროისათვის, მათზე განხორციელებული ძალადობის და ჟურნალისტური საქმიანობის ხელშეშლის ფაქტებზე გამოძიება დაწყებულია.

როგორც საიაში აღნიშნავენ, ამ ეტაპზე დაზარალებულის სტატუსი მინიჭებული აქვს მათგან 2 ჟურნალისტს.

„აღსანიშნავია, რომ საგამოძიებო ორგანოები აქტიურად უკავშირდებიან დაზარალებულ ჟურნალისტებს მათი გამოკითხვაზე დაბარების მიზნით, თუმცა, ეს პროცესი არაორგანიზებულ სახეს ატარებს, შეთანხმებულ დროს არ იწყება გამოკითხვის პროცესი. ამასთან, პირველ ეტაპზე დაზარალებულები თაბუკაშვილის ქუჩაზე მდებარე პოლიციის განყოფილებაში დაიბარეს, თუმცა, მოგვიანებით გამოკითხვის ადგილი შეიცვალა.

მნიშვნელოვანია, საგამოძიებო ორგანომ დროულად, ეფექტიანად და ორგანიზებულად აწარმოოს ძალადობის და ხელშეშლის ყველა ეპიზოდის გამოძიება, მათ შორის, დისკრიმინაციული მოტივის გამოკვეთის მიმართულებით. ამასთან, გამოძიება უნდა დაინტერესდეს და მისცეს სამართლებრივი შეფასება, რამდენად ეფექტიანად იყო დაგეგმილი და აღსრულებული საპოლიციო ძალების მობილიზება და მოქმედებები, მოვლენების ძალადობრივი განვითარების თავიდან ასარიდებლად საია განაგრძობს დაზარალებული ჟურნალისტების საქმეებზე მუშაობას და პერიოდულად მიაწვდის საზოგადოებას განახლებულ ინფორმაციას გამოძიების მიმდინარეობის შესახებ“,-აღნიშნულია „საქართველოს ახალგაზრდა იურისტთა ასოციაციის” მიერ გავრცელებულ განცხადებაში.