პარლამენტის იურიდიულ საკითხთა კომიტეტში უზენაესი სასამართლოს მოსამართლეობის კანდიდატის, ქეთევან მესხიშვილის მოსმენა მიმდინარეობს.

უმრავლესობის წევრის მიხეილ სარჯველაძის განცხადებით, მოსამართლეობის კანდიდატთან კითხვები ძირითადად შეეხება წარსულ გამოცდილებას.

“კითხვები ძირითადად მიმართულია იქითკენ, რომ გავარკვიოთ, რამდენად შეიძლება წარსული გამოცდილებიდან გამომდინარე იყოს სანდო კანდიდატი იმ კრიტერიუმების მიხედვით, რაც არის შერჩევის კრიტერიუმი უზენაესი სასამართლოს მოსამართლეობის წევრობისთვის. ასევე მნიშვნელოვანია შესაძლებლობები, რამდენად გაამდიდრებს თითოეული კანდიდატი სასამართლოს საქმიანობას. ეს იქნება ალბათ ის საკითხები, რის გარკვევასაც შევეცდებით”,- განაცხადა სარჯველაძემ.

რაც შეეხება იმას, რომ ოპოზიცია, სახალხო დამცველი და არასამთავრობო ორგანიზაციების წარმომადგენლები მოსამართლეების კანიდიდატების მოსმენას არ ესწრებიან, სარჯველაძე აცხადებს, რომ ეს დასანანია.

“აქაც ის პარადიგმა მუშაობს - ნახევრად სავსეა თუ ნახევრად ცარიელი დარბაზი. დასანანია, რომ ოპოზიცია და სახალხო დამცველი ამ პროცესს არ უერთდებიან. კარგი იქნებოდა რომ სრული წარმომადგენლობა ყოფილიყო და შეფასების მეტი შესაძლებლობა ყოფილიყო. ეს მნიშვნელოვანია მათთვისვე”,- განაცახდა სარჯველაძემ.

დღესვე, 16:00 საათიდან მოუსმენენ უზენაესი სასამართლოს კიდევ ერთ მოსამართლეს, რევაზ ნადარაიას.

ინფორმაციისთვის, იურიდიულ საკითხთა კომიტეტში პარლამენტისთვის ასარჩევად წარდგენილი უზენაესი სასამართლოს მოსამართლეობის კანდიდატების გასაუბრების პროცესი 6 ივლისს დაიწყო. იუსტიციის უმაღლესმა საბჭომ პარლამენტს 9 კანდიდატი წარუდგინა. უზენაესი სასამართლოს მოსამართლის თანამდებობაზე ასარჩევად წარმოდგენილი არიან: გოჩა აბუსერიძე, გიორგი გოგიაშვილი, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე და ლაშა ქოჩიაშვილი.