დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განცხადებით, გამოდიან ინიციატივით, რომ ტაქსებში თამბაქოს მოწევა აიკრძალოს. როგორც მან ვებინარზე განაცხადა, ინიციატივის თანახმად, ავტომობილში თამბაქოს მოწევა ასევე უნდა აიკრძალოს იმ შემთხვევაში, თუ იქ ბავშვი ან მოზარდი ზის.

„დიდი დისკუსია დაიწყო, თითქოს დაავადებათა კონტროლის ეროვნული ცენტრი გამოდის წინადადებით, რომ აიკრძალოს ტაქსებში და საკუთარ მანქანებში მოწევა. როცა კანონი მიიღეს 2017 წელს, მაშინ დაიშვა ტაქსებში მოწევის გამონაკლისი, მიუხედავად იმისა, რომ ჩვენ არ ვეთანხმებოდით, ახლა, დიახ, ინიციატივაა ის, რომ ტაქსში არ უნდა ეწეოდეს არც მძღოლი და არც იქ მჯდომი იმიტომ, რომ ის კვამლი, რომელი თამბაქოს გამონაბოლქვით გროვდება, უარყოფითად მოქმედებს ადამიანის და განსაკუთრებით, ბავშვების ჯანმრთელობაზე. ამიტომ, ჩვენ ვართ იმის ინიციატორი, რომ ტაქსებში მოწევა არ უნდა იყოს. როდესაც ტაქსებში ვსხდებით, ზოგიერთი კეთილმოსურნე მძღოლი გვეკითხება, შეიძლება მოვწიო თუ არა? არ უნდა მოწიონ. მგზავრმაც არ უნდა მოწიოს. ჩვენ გვინდა, რომ ვიყოთ ევროკავშირის წევრი, ევროპული კულტურის ნაწილი. ტაქსში რომ არ უნდა მოწიო, ეს სწორედ ევროპული კულტურის ერთ-ერთი გამოხატულებაა. ჩვენ იმის მომხრე ვართ, რომ ტაქსებში მოწევა აიკრძალოს. ადამიანები შეცდომაში შეჰყავთ, თითქოს ჩვენ ვკრძალავთ საკუთარ მანქანებში მოწევას. არა, საკუთარ მანქანქანაში ვისაც უნდა მოწიოს, მაგრამ არ შეიძლება მოწიონ იგივე საკუთარ ან სხვის მანქანაში, თუ იქ ზის არასრუწლოვანი იმიტომ, რომ ამ ქვეყნის მომავალი დამოკიდებულია ჯანმრთელ ბავშვებსა და მოზარდებზე. ამიტომ, თუ იქ სხედან ბავშვები ან არასრულწლოვნები, არ შეიძლება მოწევა. დიახ, ჩვენ ამ წინადადებით შევდივართ. თუ თქვენ მარტო მგზავრობთ თქვენი მანქანით, იქ მოწევას არავინ დაგიშლით. რეკომენდაციაა, რომ სჯობს დახურულ სივრცეში არ მოწიონ, მაგრამ ამას კანონი არ აკრძალავს. თუმცა, გამოვდივართ ინიციატივით, კერძო მანქანებში, თუ იქ ზის ბავშვი ან მოზარდი, არ იყოს თამბაქოს კვამლი და აკრძალული იყოს მოწევა“,-განაცხადა გამყრელიძემ.