იოსებ ბარათაშვილი - თუ დადგინდა, რომ 5 ივლისს, შს სამინისტროს გააჩნდა და არ გამოიყენა სათანადო რესურსი  წესრიგის დასაცავად, შს მინისტრი უნდა გადადგეს

საშინაო პოლიტიკის აქტუალურ თემებზე “ინტერპრესნიუსი“ ადვოკატ იოსებ ბარათაშვილს ესაუბრა.

- ბატონო იოსებ, ოპერატორ ალექსანდრე ლაშქარავას გარდაცვალების ფაქტთან დაკავშირებულ პრობლემურ საკითხებზე სასაუბროდ დაგიკავშირდით, მაგრამ, პროცესები სწრაფად ვითარდება და გვერდს ვერ აუვლით ვერც პრემიერის განცხადებას ოპოზიციის ულტიმატუმზე და ვერც იმას, რომ ოპოზიცია ცდილობს არ ჩაატარებინოს მმართველ გუნდს პარლამენტის სხდომა.

ოპოზიცია მითხოვს პრემიერისა და შს მინისტრის გადაყენებას. თქვენ როგორ შეაფასებდით 5-6 ივლისის მოვლენებზე ერთი მხრივ ხელისუფლების, ხოლო მეორე მხრივ ოპოზიციის რეაქციასა და მოთხოვნებს?

- ფაქტია, რომ 5 ივლისს შს სამინისტრომ ვერ უზრუნველყო წესრიგის დაცვა და მომხდარზე პასუხისმგებელია შს სამინისტრო. ვთვლი, რომ 5 ივლისს პრემიერის განცხადება არ იყო მკაფიო განცხადება და არ შექმნა წინაპირობა იმისათვის, რომ დაცული ყოფილიყო წესრიგი.

რაც შეეხება ოპოზიციის აქტიურობას. ჩემი აზრით, ძალადობრივი მოთხოვნები აზიანებს ქვეყნის განვითარებას. უნდა მოხდეს პარლამენტში 5-6 ივლისის მოვლენებზე საგამოძიებო კომისიის შექმნა. კარგი იქნება თუ ისინი დაელოდებიან ოპერატორ ლაშქარავას გარდაცვალებაზე ექსპერტიზის დასკვნას. უნდა დაიკითხონ ექსპერტები, მოწმეები. ვფიქრობ, მხოლოდ ამის შემდეგ იქნება საზოგადოებისთვის ნათელი ვინ უნდა გადადგეს და ვინ უნდა დარჩეს.

უნდა მოხდეს პარლამენტში 5-6 ივლისის მოვლენებზე საგამოძიებო კომისიის შექმნა

ამ მოვლენებმა რომ ხელისუფლებას არაფერი შემატა, ჩემთვის სრულიად ცხადია. ვფიქრობ, რომ 5-6 ივლისს მომხდარზე პასუხისმგებელია შინაგან საქმეთა სამინისტრო.

- ფიქრობთ რომ ოპოზიციის მოთხოვნა მინისტრ გომელაურის გადადგომაზე საფუძვლიანია?

- საფუძვლიანია, ოღონდ ამას უნდა უკეთესი დასაბუთება. ვიმეორებ მომხდარზე პასუხისმგებელი შს სამინისტროა, მაგრამ მინისტრი უნდა გადაგეს თუ არა, ეს მას შემდეგ უნდა მოხდეს თუ რა რესურსები მოახმარა შს სამინისტრომ და რა რესურესები არ მოხმარდა.

თუ დადგინდა, რომ შს სამინისტროს 5-6 ივლისს გააჩნდა და არ გამოიყენა სათანადო რესურსი წესრიგის დასაცავად, შს მინისტრი უნდა გადადგეს.

- ფაქტია, რომ ოპოზიციამ პარლამენტში გააპროტესტა ოპოზიციის ულტიმატუმზე პრემიერ ღარიბაშვილის განცხადებები, რომელიც მან ულტიმატუმის ამოწურვამდე ერთი საათით ადრე მთავრობის სხდომის დაწყებამდე გააკეთა.

მოლოდინი იმისა, რომ ხელისუფლება ოპოზიციის ულტიმატუმს მიიღებდა, არავის ჰქონია, მაგრამ თქვენ როგორ შეაფასებდით ოპოზიციის ულტიმატუმზე ხელისუფლების პასუხს, რომელიც პრემიერმა ირაკლი ღარიბაშვილმა გააჟღერა?

- უპირველეს ყოვლისა მწუხარებას გამოვთქვამ ოპერატორ ლაშქარავას გარდაცვალების გამო. საშინელი ცემის შემდეგ ვინც იხილა მისი სახე, შეუძლებელია ვინმე გულგრილი დარჩენილიყო, რადგან ის თავის კოლეგა ჟურნალისტს იცავდა.

ამიტომ ძალიან კარგად მესმის ჩვენი საზოგადოების მყისიერი რეაქცია და აღელვება მას შემდეგ რაც გავრცელდა ინფორმაცია ოპერატორ ლაშქარავას გარდაცვალების შესახებ.

რაც შეეხება პრემიერის განცხადებებსა და პოზიციას. მიმაჩნია, რომ 5 ივლისის დილით პრემიერის მიერ გაკეთებული განცხადება და პოზიცია იყო არასაკმარისად მკაფიო. უმაღლესი თანამდებობის პირი, რომელიც პასუხისმგებლობას იღებს ქვეყანაში მართლწესრიგის დაცვაზე, იმაზე, რომ არ მოხდეს შეტაკება, ამგვარ განცხადებებს არ უნდა აკეთებდეს.

5 ივლისის დილით პრემიერის მიერ გაკეთებული განცხადება და პოზიცია იყო არასაკმარისად მკაფიო. უმაღლესი თანამდებობის პირი, რომელიც პასუხისმგებლობას იღებს ქვეყანაში მართლწესრიგის დაცვაზე, იმაზე, რომ არ მოხდეს შეტაკება, ამგვარ განცხადებებს არ უნდა აკეთებდეს

უნდა იყოს მომზადებული იმისათვის, რომ ასეთი ფაქტები არ მოხდეს. გარდა ამისა, როგორც გამოჩნდა, არც შს სამინისტრო აღმოჩნდა მომზადებული 5-6 ივლისის განვითარებული მოვლენებისთვის და არ მომხდარიყო ის ინციდენტები, რაც ვიხილეთ.

პრემიერის განცხადებები უფრო თავის მართლებას გავდა. სამწუხაროდ, 5-6 ივლისის მოვლენებმა სახელმწიფო ინსტიტუტების სისუსტე გამოაჩინა.

- პრემიერმა ბრძანა, რომ 5-6 ივლისის მოვლენები იყო მორიგი წარუმატებელი შეთქმულება სახელმწიფოსა და საპატრიარქოს წინააღმდეგ. მომხდარი იყო ანტისახელმწიფოებრივი, ანტირელიგიური და ანტიეროვნული ქმედებები, რომლის უკან სააკაშვილი დგას.

თუ ხელისუფლებამ ახლა იცის რას ამბობს, წესით, ისიც უნდა სცოდნოდა, რომ 5 ივლისს მოვლენები შესაძლოა არასასურველი სცენარით განვითარებულიყო. ასეთ ფონზე უცნაურადაც კი გამოიყურება შს სამინისტროს წარმომადგენლების მტკიცებები რომ თურმე არ ელოდნენ, რომ პრაიდის მოწინააღმდეგე ჯგუფები ჟურნალისტებს დაერეოდნენ...

- მე ამას უფრო არაკომპეტენტურობას დავარქმევდი. ქვეყნის უმაღლესი თანამდებობის პირი პოსტკრიპტუმ აკეთებს განცხადებას, რომ თურმე ადგილი ჰქონდა სახელმწიფო გადატრიალების წარუმატებელ მცდელობას.

მინდა ყურადღება გავამახვილო იმ პრობლემაზე, თუ რასთან გვაქვს საქმე. ეს პრობლემა არ არის მხოლოდ ქართული პრობლემა,. ეს არის პრობლემა, რომელიც დაახლოებით 50 წლის წინ გამოიარა აშშ-მ, შემდეგ ევროპამ. ეს თემები ევროპაში ახლაც პრობლემურია. რამდენიმე დღის წინ უნგრეთში იქნა მიღებული კანონი მოზარდებში ჰომოსექსური პროპაგანდის წინააღმდეგ, რამაც აზრთა სხვადასხვაობა გამოიწვია.

სინამდვილეში საქმე გვაქვს ორი ღირებულების დაპირისპირებასთან. საქმე გვაქვს ერთი მხრივ გამოხატვისა და მანიფესტაციების თავისუფალ უფლებასთან, მეორე მხრივ, უმრავლესობის რელიგიური გრძნობების შეურაცხყოფასთან.

სინამდვილეში, საქმე გვაქვს ორი ღირებულების დაპირისპირებასთან. საქმე გვაქვს ერთი მხრივ გამოხატვისა და მანიფესტაციების თავისუფალ უფლებასთან, მეორე მხრივ, უმრავლესობის რელიგიური გრძნობების შეურაცხყოფასთან

ხშირად გვესმის, რომ ეს არის რუსული ნარატივი. ეს ყველაფერი გასაგებია, მაგრამ ის რაც ხდება, არის თუ არა ეს ქრისტიანობის საწინააღმდეგო? მე არ შევდივარ იმ განსჯაში ეს არის თუ არა ცოდვა, მაგრამ ერთს ვიტყვი - როგორც ახალ აღთქმაში, ისე ძველ აღთქმაში, იგივე პავლე მოციქულის ეპისტოლეებში - კორინთელთა მიმართ, ტიმოთეს მიმართ, ყველგან არის ეს ცოდვად მიჩნეული და დაგმობილი. ეს ტექსტები გადახედვას არ ექვემდებარება მორწმუნე ქრისტიანისათვის.

იგივეა ისლამშიც. იგივეა სხვა რელიგიებში. ასეთ ვითარებაში შესაძლებელია თუ არა რაც ხდება, განვიხილოთ როგორც უმრავლესობის რელიგიური გრძნობების შეურაცხყოფა?

მე არ ვსაუბრობ იმაზე, რომ ვინმეს სცემენ, ეს საშინელებაა და დაუშვებელია. ჩვენ ანტიდისკრიმინაციული კანონიც გვაქვს მიღებული და კანონითაა დასჯადი სექსუალური ნიშნით ადამიანების შეურაცხყოფა, დამცირება და დისკრიმინაცია.

მაგრამ, როდესაც ეს ხდება საჯაროდ, ყოველწლიურად გამოდის კალენდარულად, შეიძლება თუ არა ჩვენ განვიხილოთ ეს როგორც უმრავლესობის გრძნობების შელახვა? მე ვფიქრობ, რომ შეიძლება.

შესაძლებელია თუ არა რაც ხდება, განვიხილოთ როგორც უმრავლესობის რელიგიური გრძნობების შეურაცყოფა? მე ვფიქრობ, რომ შეიძლება

იმის ნაცვლად, რომ სახელმწიფომ ამაზე იფიქროს, ეს პრობლემა გააცნობიეროს და ამ მოვლენებისთვის მოემზადოს, პოპულისტურ განცხადებებს აკეთებს და ფაქტობრივად ისევ თავის პოლიტიკურ და კონიუქტურულ მიზნებს უქვემდებარებს ამას ყველაფერს. სამწუხაროდა ამას ვადევნებთ თვალს და ამიტომაც გვაქვს შედეგი სავალალო.

ასევე მინდა ვთქვა, ის მოძალადეები, რომლებიც თითქოს ქრისტეს სახელით მოქმედებენ და თითქოს ტრადიციებს იცავენ, ისინი პირიქით, ხელს უწყობენ იმის გაძლიერებას, რის საწინააღმდეგოდაც მოქმედებენ. ეს არის სრულიად ნათელი.

გამოდის, რომ ეს ხალხი, რომელიც ძალადობენ სხვებზე, ხელს უწყობენ საქართველოში ჰომოსექსუალიზმის დამკვიდრებას.

ხალხი, რომელიც ძალადობენ სხვებზე, ხელს უწყობენ საქართველოში ჰომოსექსუალიზმის დამკვიდრებას

- 5-6 ივლისის მოვლენებს მრავალი განზომილება აქვს. ზოგი მომხდარს მოახლოებულ არჩევნებსა და მომხრეების მობილიზებას უკავშირებს, ზოგი კიდევ სხვა რამეს. მაგრამ, მინდა ოპერატორ ლაშქარავასთან დაკავშირებულ თემებზე გადავიდეთ, რის გამო დაგიკავშირდით.

რა თქმა უნდა, ექსპერტიზა დაადგენს რა იყო ლაშქარავს გარდაცვალების მიზეზი, მაგრამ ჩვენ გვახსოვს თუ რა მდგომარეობაში იყო ის, მხედველობაში მაქვს მოუშუშებელი თვალი და სახეზე მრავლობითი დაზიანებები. ისიც, რომ როგორც თავად ამბობდა, მას მხოლოდ თავში ურტყამდნენ.

როცა მისი გარდაცვალების შესახებ ინფორმაცია გავრცელდა, უცებ გამიელვა აზრმა - ასე სწრაფად რატომ გამოწერეს იგი კლინიკიდან.

როცა ამბობენ კლინიკიდან ჯამრთელი გამოვწერეთო, მას გამოჯამრთელებულის ხომ არაფერი ეტყობოდა. რჩება შთაბეჭდილება, რომ თუ იგი 5 ივლისს პოლიციამ ვერ დაიცვა, შემდეგ მას ჯანდაცვის სისტემამაც დააკლო ხელი. თქვენ ასეთი შთაბეჭდილება არ დაგრჩათ?

- დიახ. მე მოვისმინე ნიუჰოსპიტალის ადმინისტრაციის განცხადება. ეს ყველაფერი საჭიროებს გამოძიებასა და გამოკვლევას. რა თქმა უნდა, ეჭვის საფუძველი ჩნდება, ადამიანი, რომელიც ვიზუალურადაც საშინლად გამოიყურებოდა, როგორ შეიძლებოდა ასე სწრაფად გამოეწერათ საავადმყოფოდან.

ეჭვის საფუძველი ჩნდება, ადამიანი, რომელიც ვიზუალურადაც საშინლად გამოიყურებოდა, როგორ შეიძლებოდა ასე სწრაფად გამოეწერათ საავადმყოფოდან

თუ მას მინიმუმ ტვინის შერყევა ჰქონდა, იგი უფრო დიდხანს მკურნალობას საჭიროებდა.

- „ინტერპრესნიუსის“ ფოტოკორესპოდენტი, რომელსაც 5 ივლისს თავში ურტყეს, ახლაც საავადმყოფოში რჩება და როგორც ვიცი, კიდევ კარგა ხანს მოუწევს იქ ყოფნა...

- რა თქმა უნდა, ეს კითხვები არის დღის წესრიგში და ამ კითხვებზე უნდა გასცეს პასუხი იმ სავადმყოფომ, რომელშიც ლაშქარავა მკურნალობდა.

გარდა ამისა, ძალიან მნიშვნელოვანია პირდაპირი მიზეზობრივი კავშირის დადგენა. ყველამ ვიხილეთ ჩვენ ეს საშინელი ძალადობის აქტი და ლექსოს სახე და რასაც ის ყვებოდა ამ ამბებზე.

ამის შემდეგ რა მოხდა? სად და როგორ გადაადგილდებოდა? თუ ჩვენი ხელისუფლებისათვის ცნობილია რა ხდება ფონიჭალაში, ვგულისხმობ იმას, რომ ეს არის ნარკოტიკების გასაღების ცენტრი, რატომ არ მოეღება ამას ერთხელ და სამუდამოდ ბოლო.

რას უკავშირდებოდა მისი გადაადგილების ასე გაშუქება? პასუხგაუცემელი კითხვები ძალიან ბევრია. უნდა დაიდოს ექსპერტიზის დასკვნა.

- გადაადგილების მარშრუტის ჩვენება ბევრმა გარდაცვლილის დისკრედიტაციის მცდელობად შეაფასა. ვთქვათ, დადგინდა, რომ შესაძლოა ზედოზირებას ჰქონდა ადგილი. ეს რამეს ცვლის, თუ ცვლის რას?

- დამრჩა შთაბეჭდილება, რომ უნდათ მისი გარდაცვალება დაუკავშირონ ნარკოტიკების მოხმარებას. ფაქტი იმისა, რომ ჟურნალისტი და ოპერატორი სრულიად დაუცველები იყვნენ 5 ივლისს, სახელმწიფომ ვერ უზრუნველყო პროფესიული მოვალეობის შესრულებისას მათი დაცვა, ეს არის მთლიანად ხელისუფლების პასუხიმგებლობა.

კითხვები არსებობს და მათზე პასუხებიც უნდა გაიცეს. თუ ეს პასუხები არ იქნება დამაკმაყოფილებელი, შემდეგ ყველაფერს შეფასება უნდა მიეცეს სამართლებრივი.

უფრო სწორი იქნებოდა ლაშქარავას საქმე აღძრულიყო სხეულის დაზიანების მუხლით, რასაც მოჰყვა გარდაცვალება. შემდეგ გამოძიება დაადგენდა რა დადასტურდებოდა და რა არა

- ლაშქარავას გარდაცვალებაზე საქმე აღძრულია 115-ე მუხლით, რაც გარდაცვლილის თვითმკვლელობამდე მიყვანას ითვალისწინებს. თქვენი აზრით რამდენად სწორადაა საქმე აღძრული?

- ეს არის სტანდარტი, რომელიც არის ჩემი აზრით მავნე. თუ ადამიანი გარდაიცვლება და არის რაიმე საეჭვო გარემოება, ყველა საქმეს თვითმკვლელობამდე მიყვანის მუხლით იწყებენ.

ჩემი აზრით უფრო სწორი იქნებოდა ლაშქარავას საქმე აღძრულიყო სხეულის დაზიანების მუხლით, რასაც მოჰყვა გარდაცვალება. შემდეგ გამოძიება დაადგენდა რა დადასტურდებოდა და რა არა.

ვხედავ, რომ ხელისუფლება არ არის კვალიფიციური. რომ გაეთვალისწინებინა ბატონ ღარიბაშვილს და შს მინისტრს რა საფრთხე იყო მოსალოდნელი 5 ივლისს, იმ დღეს საფრთხეების აცილება დიდწილად შესაძლებელი იქნებოდა

- გუშინ ერთერთმა ექსპერტმა თქვა, რომ ლაშქარავას ექსპერტიზის პასუხის მიღებას თვე- თვენახევარი დასჭირდებაო. ამ ტიპის საქმეებზე ექსპერტიზას მართლა ამდენი დრო სჭირდება?

- ასეთ შემთხვევებში ექსპერტიზა მაქსიმუმ ერთ კვირაში, შესაძლოა ნაკლებ დროშიც კი კეთდება. ჩემი აზრით, სისხლის ანალიზია გასაკეთებელი, ასევე ის, რაზეც უკვე განაცხადა ექსპერტმა - არის თუ არა სისხლჩაქცევები გარდაცვალების მიზეზი.

ვფიქრობ, რომ ლაშქარავას საქმეზე დასკვნა საექსპერტო დაწესებულებამ რამდენიმე დღეში უნდა დადოს.

- ვხედავთ, რომ ხელისუფლების წარმომადგენლები ახლა აცხადებენ რომ საქართველო გამონაკლისი არაა, სადაც ძალადობა ხდება.

კი ბატონო, მაგრამ ჩვენ ვხედავთ იმასაც რომ ძალადობას ამერიკაშიც ებრძვიან და ევროპაშიც. თუ მოქალქეების, მათ შორის ჟურნალისტების დასაცავად პოლიციელების ნაწილის თავდადებას არ ჩავთვლით, ამის მსგავსი რამ ჩვენ 5 ივლისს არაფერი გვინახავს...

- ძალადობა ჩვენ ვნახეთ საფრანგეთშიც, დანიაშიც იყო ჟურნალისტების მიმართ ძალადობა. იქაც ხშირად უკავშირდება ამგვარი რამ რელიგიური გრძნობების შეურაცხოფას.

ევროპულ შემთხვევებში სახელმწიფო კარგად იყო მომზადებული, ვიდრე ჩვენი ხელისუფლება.

- ოპოზიცია ამტკიცებს, რომ ხელისუფლებამ ხელი შეუწყო მოძალადეების თარეშს. თქვენი დაკვირვებით რამდენად საფუძვლიანია ამგვარი ბრალდება?

- მე ოპოზიციის ამ კონკრეტულ ბრალდებას არ ვიზიარებ. მე უბრალოდ ვხედავ, რომ ხელისუფლება არ არის კვალიფიციური. რომ გაეთვალისწინებინა ბატონ ღარიბაშვილს და შს მინისტრს რა საფრთხე იყო მოსალოდნელი 5 ივლისს, იმ დღეს საფრთხეების აცილება დიდწილად შესაძლებელი იქნებოდა.

დროზე უნდა მოვეგოთ გონს ყველა. ეს ხელისუფლებასაც ეხება, ოპოზიციასაც და საზოგადოებასაც. სხვა შემთხვევაში ეს ქვეყანა შესაძლოა ისე შემოგვეფშვნეს ხელში, რომ ვერც კი გავიგებთ. რომ გავიგებთ, მერე გვიან იქნება

ხელისუფლება ვერ ახდენს ისეთი ფაქტების პრევენციას, რაც აშკარაა, რომ შეიძლება მოხდეს. ეს კი მის არაკომპეტენტურობაზე მიუთითებს.

- 5-6 ივლისის შემდეგ აშკარად არასასურველი სცენარით ვითარდება პროცესები. თქვენი დაკვირვებით სავარაუდოდ როგორ შეიძლება განვითარდეს პროცესები?

- თუ ხელისუფლება მოეგება გონს და შეეცდება მაქსიმალურად გამოავლინოს და დასაჯოს ის პირები, ვინც 5-6 ივლისს დანაშაულს სჩადიოდა, ამავე დროს იფიქრებს და მივა იმ დასკვნამდე რომ ლგბტ თემის პრობლემები საჭიროებს საკანონმდებლო გზით, ასევე მოლაპარაკებების გზით გადაწყვეტას.

ამ პროცესში შეიძლება იყოს ჩართული საერთაშორისო საზოგადოება. თუ ეს ხელისუფლებამ არ გააცნობიერა და არ გაითვალისწინა, შედეგი გვექნება სავალალო. სამწუხაროა, რომ ხელისუფლება ვერ ახერხებს ყველა კრიმინალურმა ფაქტმა არ გამოიწვიოს აფეთქება.

შარშან ამ დროს აქტუალური იყო ბაჩალიაშვილის საქმე, მანამდე იყო შაქარაშვილის საქმე. ეს საქმეები გარკვეულ წილად აღარაა დღის წესრიგში. ოპოზიცია ყველაფერს აკეთებს იმისათვის, რომ სიტუაცია დაიძაბოს. ხელისუფლება არის სუსტი, ქვეყანაში არის პანდემია, არის საშინელი ეკონომიკური კრიზისი, თვალს ვადევნებთ კრიზის ეკლესიაში, ეს ყველაფერი არის ის, რაც ქვეყანას უფსკრულისკენ მიაქანებს. ამას ემატება ის, რომ საზოგადოება გაყოფილია.

- პოლარიზებას გულისხმობთ?

- სამწუხაროდ, ვითარება ასეთია - საზოგადოებაში ნდობა არავინ იმსახურებს. ეკლესიის მიმართ ამდენი კრიტიკა არასდროს ყოფილა. ეს ძალიან სამწუხარო სიმპტომატური ფაქტია.

დროზე უნდა მოვეგოთ გონს ყველა. ეს ხელისუფლებასაც ეხება, ოპოზიციასაც და საზოგადოებასაც. სხვა შემთხვევაში ეს ქვეყანა შესაძლოა ისე შემოგვეფშვნეს ხელში, რომ ვერც კი გავიგებთ. რომ გავიგებთ, მერე გვიან იქნება.

განსხვავებული აზრის მიუღებლობა ერთმანეთის მიმართ მტრობა, ტელევიზიების პოლიტიზირებულობამ სახიფათო ზღვარზე დააყენა ქვეყანა. არის არხები, რომელსაც ხელისუფლება აკონტროლებს, არის არხები, რომელსაც ოპოზიცია აკონტროლებს.

ჩვენ სულ ახლახან დიდი პოლიტიკური კრიზისი გადავიტანეთ. ჩვენი პარტნიორების, აშშ-სა და ევროკავშირის ძალისხმევით კრიზისის ერთი ეტაპი გავიარეთ. ახლა მოდის მეორე ეტაპი, რადგან შემოდგომაზე ადგილობრივია არჩევნები გვაქვს. ფაქტია, რომ ამ საკმაოდ მნიშვნელოვან არჩევნებს ქვეყანა უამრავი პრობლემებით ხვდება.

- პარლამენტში ისე ვითარდება პროცესები, არაა გამორიცხული პარლამენტში შესული ოპოზიცია ისევ გარეთ გამოვიდეს. ან მმართველმა გუნდმა მიიღოს გადაწყვეტილება და ოპოზიციონერ დეპუტატებს შეუწყვიტოს უფლებამოსილება.

ამგვარი ალბათობა რამდენად დიდია?

- არა მგონია არჩევნებამდე გარეთ გამოვიდეს ოპოზიცია. მაგრამ, თუ მოახლოებული არჩევნები არ ჩატარდება გამჭირვალედ და საერთაშორისო საზოგადოების მეთვალყურეობით, არჩევნების შედეგების მიმართ კითხვის ნიშნები იქნება, ისევ წარმოიშობა კრიზისი. თუ ასე მოხდა, ამის შემდეგ რა მოხდება, არავინ არ იცის.

ინტერპრესნიუსი

კობა ბენდელიანი

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს